Dacurt ha l'Associaziun internaziunala per la construcziun da punts IABSE (International Association for Bridge and Structural Engineering) consegnà il "Outstanding Structure Award" (distincziun extraordinaria 2001) per la punt da Sunniberg sper Claustra. La ceremonia festiva ha gì lieu en il rom da la conferenza da la IABSE a Malta. La punt da Sunniberg che ha ina lunghezza da 526 meters ed è daventada en il fratemp il segn caracteristic conuschì en tut il mund dal sviament da Claustra, ha tras quai retschavì d'ina associaziun internaziunala d'inschigners ina distincziun internaziunala renumada per sias qualitads architectonicas ed esteticas. Tut ils participads a la construcziun da questa punt pon perquai esser particularmain superbis dal resultat da lur lavur en il Partenz. Ina tecnica innovativa cun cordas traversalas ed in mastergn da construcziun cumprovà han mess in nov monument al betun sco materia da construcziun. Ils 15 da settember 2001, en occasiun d'ina festa a Claustra-Serneus, vegn il president da la IABSE, ing. dipl. Klaus H. Ostenfeld da la Danemarca, ensemen cun auters commembers, a fixar la plachetta da bronz vi da la punt.

Gremi: uffizi da construcziun bassa dal Grischun
Funtauna: rg uffizi da construcziun bassa dal Grischun