Cun tutta forza lavuran la confederaziun, ils chantuns e las
vischnancas vi dal project "Guichet virtuel" (spurtegl electronic). Gia
prest duain las burgaisas ed ils burgais pudair contactar las autoritads
er en l'internet.
L'emprima emprova da pilot entschaiva la fin da 2001 sut il num
www.ch.ch en l'internet. Las lavurs en curs pon ins suandar gia oz en
l'internet sut www.admin.ch/e-gov.
Spurtegl virtual da las autoritads
L'idea dal spurtegl virtual è quella da crear in access direct a las
autoritads statalas da tut ils stgalims. Quel spurtegl vegn ad esser
structurà tenor las situaziuns da la vita quotidiana da las burgaisas ed
ils burgais. Pussaivels èn en quest connex chavazzins sco naschientscha,
maridaglia, midada, scolas, chatscha, servetsch militar, ta-glias, mort
e.u.v. Partend da quests chavazzins vegnan las applitgadras ed ils
applitgaders guidads directamain tar las autoritads cumpetentas. En la
gronda part dals cas èn quai las vischnancas, per part ils chantuns u la
confederaziun. Ils cuntegns dal spurtegl virtual vegnan concepids
communablamain dals uffizis cumpetents tar la confederaziun, ils
chantuns e las vischnancas.
Infurmaziun-communicaziun-transacziun
Tgi che dovra il spurtegl virtual, na duai betg mo pudair s'infurmar
e sa preparar, mabain er sa spargnar il viadi tar las autoritads e
reglar il pajament d'eventualas taxas gist per posta electronica.
Singulas autoritads offran gia oz transacziuns (p.ex. formulars,
reservaziuns e.u.v.). Cun il project da pilot che curra fin la fin da
l'onn 2002, vegn constituida ina infrastructura che po vegnir duvrada
per tut las autoritads. Avertas èn actualmain anc diversas dumondas
concernent la segirezza da las datas (codificaziun, suttascripziun
digitala). Ina gruppa federala da project sa stenta dentant da schliar
quellas e da preparar la basa legala necessaria.
Il Grischun cooperescha activamain
Ils differents gremis dal project han cumenzà lur lavur l'entschatta
da quest onn. Il Grischun è bain represchentà en la gruppa
accumpagnanta. Sper dus impiegads chantunals èn participadas las
sequentas quatter vischnancas da pilot: Favugn, Mesauc, Samedan e Vaz.
La finamira principala actuala è, ultra da la constituziun da
l'infra-structura necessaria, quella d'obtegnair l' "effect d'ina
lavina". Uschia vulan ins procurar che tut las vischnancas svizras sajan
preschentas fin la fin da 2001 en il spurtegl virtual. Vischnancas che
n'han betg anc ina website, vegnan menziunadas almain cun lur adressa
postala, lur adressa e-mail e/u lur numer da fax sco er cun lur numer da
telefon.
Tgi paja?
Il project spurtegl virtual na mida nagut da l'urden da cumpetenzas
existent en il federalissem svizzer. La gruppa accumpagnanta vegn
dentant ad elavurar directivas per ils cuntegns standard d'in tema e per
ils aspects tecnics e la controlla da qualitad. Per sustegnair tut
questas lavurs, stabilescha la confederaziun uschenumnads "helpdesks"
per ils chantuns e las vischnancas. La confederaziun metta a disposiziun
la plattafurma tecnica multilingua e procura er ch'i vegnia etablida ina
infrastructura da segirezza. Cun questas presta-ziuns preliminaras vul
la confederaziun garantir ina procedura coordinada. Per il futur
manaschi (a partir da 2003) è previsa ina separaziun mez per in dals
custs tranter la confederaziun ed ils chantuns cun lur vischnancas.
Actualmain fan ins quint cun custs da gestiun annuals da totalmain dus
milliuns francs a partir da 2003.
Princip da solidaritad
Tut las bunamain 3'000 vischnancas svizras e pia er tut las 212
vischnancas grischunas duain en scadin cas pudair profitar medemamain da
las lavurs da project. Il project communabel spurtegl virtual vegn purtà
da solidaritad. Las vischnancas pitschnas duain pudair profitar da
quellas che possedan gia ina offerta considerabla en l'internet. Ellas
duain obtegnair agid, co ch'ellas arrivan spert ed a moda bunmartgada
tar lur cumparsa en l'internet e co ch'ellas pon metter a disposiziun
ina offerta minimala en il spurtegl virtual.
Gremi: Chanzlia chantunala dal Grischun
Funtauna: rg Chanzlia chantunala dal Grischun