La scola professiunala da sanadad e tgira da malsauns, la scola da dunnas dal Grischun, la scola interconfessiunala da sanadad e tgira da malsauns dal Grischun e la scola grischuna per tgira duain vegnir transferidas en in nov center da scolaziun per professiuns dals fatgs da sanadad e socials. Quatter scolas (dus uffizis e duas fundaziuns) da differenta grondezza, structura ed activas en differents secturs centrals fusiuneschan ad ina nova scola. La regenza piglia enconuschientscha dal nov concept per transferir las quatter scolas en ina nova structura. Quest concept è vegnì elavurà d'ina giunta da project e da las direcziuns da las quatter scolas. El cuntegna ils princips ils pli impurtants e las directivas da planisaziun. La nova scola vegn structurada en centers da prestaziun che correspundan als stgalims da furmaziun. Ella duai vegnir concepida integrond tut ils collavuraturs e las collavuraturas da fin uss da las quatter scolas. L'entschatta da la scolaziun professiunala en ils fatgs da sanadad e socials è previsa per l'onn 2004. Ordavant vegn il pievel a pudair s'exprimer davart in respectiv project da lescha.

Contribuziuns culturalas
I vegnan pajadas contribuziuns e garanzias da deficit d'in import total da 203'500 francs a las suandantas ovras ed occurrenzas culturalas:
- represchentaziun da l'opera "Don Giovanni" da Wolfgang Amadeus Mozart tras l'uniun Schloss Oper Haldenstein dals 10 fin ils 26 d'avust 2001,
- retscha da concerts "Wald Haus Musik" dals 14 fin ils 28 da fanadur 2001 a Flem,
- ediziun d'in DC e d'ina cronica tras il chor viril Breil a chaschun da ses giubileum da 100 onns,
- program d'occurrenzas da la Klibühni da l'avrigl fin il december 2001,
- otgavels dis da las culturas alpinas a Tusaun dals 21 fin ils 26 d'avust 2001,
- trais exposiziuns d'art moderna la stad/l'atun 2001 en la "Rimessa Castelmur" a Stampa/Coltura,
- exposiziuns "Die Schaukel" ed "Aus Sammlungen" durant l'onn 2001 en la chasa melna a Flem,
- exposiziun "Der Freistaat der drei Bünde - seine grosse Bedeutung im europäischen Geschehen" dals 22 da fanadur fin ils 17 d'avust en la Chesa Planta a Zuoz,
- represchentaziuns dal toc "Zisca" il fanadur 2001 en set lieus dal chantun tras la gruppa da teater "Palc ladin",
- represchentaziuns dal toc "Ei catscha la primavera" ("Frühlings Erwachen" da Frank Wedekind) il zercladur 2001 tras la Cumpignia da teater Laax,
- project d'art "Stoff, eine Begegnung" da Peter Trachsel, Küblis,
- producziun dal film dramatic "Der Code" da Hercli Bundi,
- producziun dal film dramatic "Aufhellungen im Laufe des Tages" dad Anna-Lydia Florin,
- producziun dal film documentar " Toni el Suizo - 100 Brücken für Mexiko" davart Beat Anton Rüttimann, Puntraschigna, da Philippe Grand,
- ediziun dal cudesch "Pennarias/Schreibfedereien" da Jacques Guidon,
- ediziun dal cudesch "Raschledas dal Schlarigna d'üna vouta",
- ediziun dal "Ischi" 2001 ("La spina ella spatla" da Gion Deplazes) tras la Romania,
- ediziun d'in tom da poesias da Leta Semadeni, Zuoz,
- ediziun d'in cudesch da fotografias "To the Happy Few" da Dino Simonett, ed
- ediziun dal guid da viandar e da cultura "Via Spluga" da Kurt Wanner.

Nov num: uffizi da chatscha e pestga
Ils dis da la denominaziun "inspecturat da chatscha e pestga" èn quintads. A partir da l'entschatta da l'onn 2002 sa cloma quel "uffizi da chatscha e pestga" (UCP), talian: "Ufficio per la caccia e la pesca" (UPC), tudestg: "Amt für Jagd und Fischerei" (AJF). La legislaziun sin il sectur da la chatscha e pestga è sa midada marcantamain ils davos 15 onns, las incumbensas da l'inspecturat da chatscha e pestga èn s'extendidas pli e pli. Spezialmain ha el survegnì numerusas incumbensas ecologicas. Il nov num duai exprimer il vast champ d'incumbensas.

Da las vischnancas
Ils projects da construcziun pertutgant la renovaziun e sanaziun da las chasa da scola en il vitg sco er da la "chasa da scola cotschna" a Tusaun vegnan approvads definitivamain. Als custs imputabels da totalmain 1.4 milliuns francs vegnan empermessas contribuziuns chantunalas da 17.5 pertschient.
Il project preliminar concernent la renovaziun e l'engrondiment da la scola e da la scolina a Valendau vegn da princip approvà. Custs imputabels var 2.5 milliuns francs, contribuziuns chantunalas empermessas 40 pertschient.
Il project forestal integral Trun vegn approvà. Als custs totals da var 4.4 milliuns francs vegnan empermessas contribuziuns chantunalas da circa 950'000 francs.
Il project per l'amplificaziun dal parcadi sin l'areal dal restaurant d'autostrada Mövenpick-Heidiland-SA a la A13 a Maiavilla vegn approvà. Igl è da quintar cun custs da var 500'000 francs, dals quals il chantun surpiglia in terz.
Per differents projects da construcziuns da vias en il chantun vegnan dads libers credits d'in import total da 26.2 milliuns francs (installaziuns da communicaziun sin la ruta dal San Bernardin, cuvrida e saivs directivas sin la A13 tranter Fuchstobel e Medel (Valragn), correctura da la via dal Malögia tranter Coltura e Promontogno, punt sur il vallun Buchwald sin la via da Stussavgia, mantegniment da la via da Breil, renovaziun entaifer il vitg da Reschen, renovaziun dal tunnel Starlera sin la via d'Avras, amplificaziun da la via da la Lumnezia en il sectur Val Miedra-Vrin, cuvrida Mantogna interiura, mantegniment punt sur il vallun da Castiel).

Gremi: regenza
Funtauna: rg chanzlia chantunala dal Grischun