Dapi quasi trais onns èn sa chasads salamanders nairs, raunas da
prada, rustgs brins, piuschas cotschnas e crestadas sco er rustgets dal
venter mellen en las 19 plazzas da frega per amfibis a Favugn e sa
multiplitgeschan bain. Cun il project d'impurtanza regiunala duai vegnir
realisada ina colliaziun tranter las plazzas da frega existentas en la
vischnanca, e quai per cumbatter l'extincziun da spezias d'amfibis.
Durant ils onns 2001 fin 2003 vul la vischnanca da Favugn construir 15
ulteriurs puzs. Ils custs totals dad 82'500 francs vegnan repartids
tranter la confederaziun (38 pertschient), il chantun (42 pertschient) e
la vischnanca (20 pertschient).
Contribuziuns culturalas
I vegnan empermessas contribuziuns da totalmain 17'500 francs a:
- participaziun dal collegi grischun d'artigliaria , Ziràn, sco
represchentanza uffiziala dal Grischun al cortegi istoric a Basilea dals
19 d'avust a chaschun da la participaziun dal chantun Basilea-Citad e
Basilea-Champagna a la Confederaziun avant 100 onns, ed
- ediziun d'in register d'ovras dals dissegns e dals maletgs
panoramics da Hans C. Escher von der Linth (1767 fin 1823) tras la
fundaziun Societad-Linth-Escher.
La regenza è da princip per zonas da spertadad maximala da 30 km/h e
per zonas da scuntrada
En sia posiziun a la confederaziun beneventa la regenza grischuna da
princip las stentas da la confederaziun per meglierar las segirezza dal
traffic. Las zonas da spertadad maximala da 30 km/h sco er las zonas da
scuntrada proponidas megliereschan la segirezza dal traffic e la
qualitad da viver. Tuttina rinviescha la regenza al fatg che
l'integraziun da vias principalas sto restar l'excepziun.
In dretg da responsabladad unifitgà vegn beneventà
Er l'unificaziun previsa dal dretg da responsabladad tras la
revisiun dal dretg d'obligaziuns (DO) e da differentas leschas spezialas
vegn beneventà. Ina tscherta coordinaziun duai vegnir cuntanschida tras
ina part generala dal dretg da responsabladad en il DO.
Da las vischnancas
Il project per la renovaziun e la sanaziun da las chasas B e C da
l'ospital chantunal e regiunal retic a Cuira vegn approvà. Ils custs da
construcziun èn previs cun var 12 milliuns francs. Da quels vegn il
chantun a surprender circa 8.5 milliuns.
Per differents projects da construcziuns da vias en il chantun
vegnan dadas libras contribuziuns d'in import total da var 9.4 milliuns
francs (renovaziun dal tunnel dal San Bernardin, midada da construcziun
a la colliaziun Landquart ost, amplificaziun A13 Roffla, galaria cunter
crudada da crappa Marmorera sin la via dal Güglia, cuvrida da la via dal
pass dal Fuorn, sanaziun da la via da Tschiertschen en ils conturns da
Ricaldei, sanaziun da la via da Lüen e sanaziun da la via da Schuders).
Persunal
- Valentin Luzi, naschì 1958, da ed a Jenaz, daventa manader da la
partiziun d'agricultura tar l'uffizi d'agricultura, meglieraziun da
structura e mesiraziun (UAMM). El cumenza l'entschatta da l'onn 2002.
- Johann Heinrich Müller, naschì 1955, da Schaffusa, domicilià a
Bravuogn, daventa cumissari da taglia tar l'administraziun da taglia. El
cumenza l'entschatta d'october.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun