Dapi l'entschatta da mars datti il nov post spezialisà per la protecziun da l'uffant a la Grabenstrasse 40 a Cuira. Ella assistescha uffants, dals quals igl è vegnì fatg abus e ch'èn vegnids maltractads en il chantun Grischun e po vegnir consultà durant 24 uras sut il numer da telefon 081-258 31 90.
Ultra dal sectur regular da l'agid a victimas offra il nov post spezialisà uss er cussegliaziun ed assistenza sin il sectur da la protecziun da l'uffant per l'entir territori chantunal. Quest servetsch spezial vegn garantì da tuttas uras tras totalmain sis persunas che derivan en emprima lingia dals secturs spezials lavur sociala e psicologia. En il center da la lavur stat il bain da l'uffant u dal giuvenil pertutgà. Quest princip è pia er la finamira suprema da scadina intervenziun.
Il post spezialisà per la protecziun da l'uffant s'occupa d'uffants e giuvenils ch'èn probablamain u cumprovadamain daventads victimas d'in maltractament u ch'èn smanatschads d'in maltractament. La noziun "maltractament d'in uffant" cumpiglia tranter auter il maltractament fisic u psichic, l'abus sexual e la negligientscha. Tut las persunas ch'han dumondas davart la protecziun da l'uffant, il maltractament da l'uffant, la violenza sexuala e/u corporala u che giavischan ina cussegliaziun, pon sa drizzar al post spezialisà per la da protecziun da l'uffant. Spezialmain sa drizza l'offerta ad uffants e giuvenils pertutgads, a lur geniturs, a lur confamigliars ed ad autras persunas da referiment sco er a spezialistas e spezialists, ad instituziuns ed ad autoritads. Il post spezialisà per la protecziun da l'uffant offra in servetsch al telefon da 24 uras per cussegliaziuns. La purschida d'assistenza cumpiglia er l'accumpagnament en situaziuns da crisa, ils scleriments, sch'ins dubita in abus u il sustegn en il rom da proceduras penalas. L'entira intervenziun succeda en collavuraziun cun ulteriuras spezialistas e cun ulteriurs spezialists ed uffizis. Il post spezialisà per la protecziun da l'uffant è integrà en l'uffizi chantunal dal servetsch social.

Gremi: departament da giustia, polizia e sanitad dal Grischun
Funtauna: rg departament da giustia, polizia e sanitad dal Grischun