Navigation

Inhaltsbereich

  • Erste Mitteilung
  • Neuen Beitrag einfügen
Sut la direcziun da deputà Markus Feltscher, Favugn, ed en preschientscha da cusseglier guvernativ Claudio Lardi, schef dal departament d'educaziun, cultura e protecziun da l'ambient, ha tractà dacurt ina cumissiun predeliberanta dal cussegl grond la revisiun parziala da la cuvegna davart il Tecnicum nov a Buchs (NTB). La cumissiun ha decidì unanimamain da s'occupar dal project, ed ella recumonda al cussegl grond da tractar la revisiun parziala da la cunvegna das purtaders dal NTB (il Principadi da Liechtenstein sco er ils chantuns Son Gagl e Grischun) durant la sessiun da matg. En il center da la revisiun parziala stattan l'adattaziun da la cunvegna al svilup actual da las scolas autas professiunalas e la flexibilisaziun da l'activitad operativa dals organs da scol'auta. Surtut duai vegnir pussibilitada la direcziun dal NTB cun mandat da prestaziun e budget global sco er l'introducziun da custs da studi.
Al lieu da la scol'auta interstatala per tecnica a Buchs NTB ha la cumissiun dal cussegl grond pudì prender invista dals cuntegns dal curs d'instrucziun modern da scol'auta professiunala "tecnica da sistem" ed ha pudì s'informar davart ils elements dal mandat da prestaziun tenor la lescha federala davart las scolas autas professiunalas.
La cumissiun ha deliberà il project senza midadas per mauns dal cussegl grond. Ella è dal medem avis sco la regenza, numnadamain ch'igl è fundamental per il Grischun sco regiun da scolaziun e d'economia sco er per la collavuraziun existenta tranter il NTB e la HTW a Cuira ch'il chantun Grischun saja er purtader dal NTB.
Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond
Neuer Artikel