En il curtin per part plantà cun guaud da la clinica psichiatrica Beverin a Cazas vegn construì in implant da minigolf cun 18 foras. Da quel duain far diever tant las pazientas ed ils pazients e las visitadras ed ils visitaders da la clinica sco er persunas d'ordaifer. Previs èsi da situar l'implant al nord da l'edifizi dals medis e da l'administraziun. Sco partenza dal percurs serva il café dals pazients Vazerol che vegn adattà correspundentamain. Dal fond per pazients vegnan dads libers 400'000 francs per quests projects da construcziun. Ils gudogns dal manaschi da quest implant returnan en quest fond e stattan pia puspè a disposiziun a las pazientas ed als pazients.
Reglar da nov la scolaziun sin il champ da sanadad e social
La regenza avra la consultaziun pertutgant in sboz per ina nova lescha davart scolas sin il champ da sanadad e social. Il termin dura fin mez fanadur 2001. La finanziaziun e direcziun da las scolaziuns sin il champ da sanadad e social èn da reglar da nov pervia da las midadas che sa mussan. Ultra da quai duain la scola da dunnas dal Grischun, la scola professiunala da sanadad e tgira da malsauns, la scola interconfessiunala da sanadad e tgira da malsauns dal Grischun e la scola grischuna da tgira sin il sectur psicosocial fusiunar ad in center da scolaziun per professiuns da sanadad e socialas cun la furma d'in institut da dretg public. Questas novaziuns pretendan ina regulaziun legala correspundenta.

Consultaziun a la confederaziun
Envers la confederaziun piglia la regenza posiziun davart l'uschenumnà pachet cumplessiv Posta/Swisscom. Ella sustegna da princip las finamiras dals projects da rinforzar la cumpatibilitad da la Posta e da la Swisscom. La Posta e la Swisscom ch'èn sortidas da l'anteriur monopol PTT survivan dapi 1998 en in ambient liberalisà. Il svilup rasant e dinamic sforza dentant d'amplifitgar la libertad d'agir da las duas interpresas. La regenza accentuescha ch'ella na po betg acceptar ni ina reducziun da las prestaziuns, ni cundiziuns localmain differenziadas. Il provediment fundamental sco er las plazzas da lavur en las regiuns da muntogna e periferas ston en scadin cas vegnir mantegnids. In servetsch public equivalent en l'entir pajais po senz'auter custar insatge. La liberalisaziun ch'ins vul cuntanscher po vegnir acceptada be, sche las mesiras accumpagnantas fan dal tuttafatg effect er en il Grischun.

Da las vischnancas
La constituziun cirquitala da la Tumleastga vegn approvada.
Per differents projects da construcziuns da vias en il chantun vegnan dads libers credits d'in import total da var 4.5 milliuns francs (cuvrida entaifer il vitg da Segl Maria, amplificaziun Rofla A13, cuvrida Ziràn-Runtgaglia A13, sanaziun da la punt inferiura Rüti Sur (Valragn) A13, sanaziun da la via d'Avras, cuvrida da la via Shell en Engiadin'ota e cuvrida Maiavilla-Fläsch).

Persunal
La fin d'avrigl èn ids en pensiun ils suandants emploiads chantunals:
- Andreas Eggenberger, Filisur, guardiaselvaschina tar l'inspecturat da chatscha e pestga,
- Eva Kabai, Cazas, emploiada da cuschina en la clinica Beverin,
- Josef Kabai, Cazas, collavuratur tecnic en la clinica Beverin,
- Hans Pitschi, Cuira, polizist chantunal,
- Wieland Seeli, Vuorz, cumissari da taglia,
- Jürg Stahel, Claustra-Selfranga, selvicultur cirquital.
- Beat Allemann, naschì 1946, domicilià a Grenchen, daventa a l'entschatta d'october medi directiv per anestesia a l'ospital da dunnas Fontana a Cuira.
- Franzestg Cajacob, naschì 1964, da Sumvitg, domicilià a Mustér, daventa revisur/cussegliader da vischnancas tar l'inspecturat da vischnancas. El cumenza l'entschatta da settember.
- Silvia Frangi, naschida 1949, da Como, domiciliada a Cuira, daventa cumissaria da taglia. Ella
- cumenza l'entschatta da matg.
- Renzo Bivetti, naschì 1950, da Castasegna e Segl, domicilià a Cuira, daventa cumissari da taglia. El cumenza l'entschatta d'avust.
- Ignaz Deflorin, naschì 1956, da ed a Mustér, daventa cumissari da taglia. El cumenza l'entschatta da fanadur.
- Hansjürg Frehner, naschì 1949, dad Urnäsch, domicilià a Domat, daventa a l'entschatta 2002 schef da la tecnica stradala e viceschef da la polizia da traffic tar la polizia chantunala.
- Paul Jegi, naschì 1952, da Molinis, domicilià a Cuira, daventa cumissari da taglia. El cumenza l'entschatta d'avust.
- Daniel Wuest, naschì 1968, dad Oberriet-Eichenwies, domicilià a Sargans, daventa revisur/cussegliader da vischnancas tar l'inspecturat da vischnancas. El cumenza l'entschatta da settember.
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun