Sut il patrunadi dal chantun Grischun vegn preschentà a la HIGA l'exposiziun speziala "digital world". Ella dat ina invista en las novas tecnologias d'infurmaziun e communicaziun. 1000 giuvenils tranter 14 e 18 onns retschaivan entradas gratuitas ch'els pon retrair via internet.
Venderdi, ils 18 da matg vegn averta l'exposiziun da commerzi, industria e mastergn a Cuira. Ella dura fin e cun dumengia, ils 27 da matg. Ina da las exposiziuns spezialas sa cloma "digital world", s'occupa da las novas tecnologias d'infurmaziun e da communicaziun ed infurma davart l'impurtanza creschenta per l'economia e la societad da questas branschas sco er davart lur schanzas e pussaivladads. I vegn preschentà l'entir spectrum da servetschs da prestaziun e d'applicaziuns sin quest sectur tras interpresas dal lieu.
"digital world" vegn realisà da las sequentas interpresas: Spin (servetschs d'internet, Hosting, Security), deep (Web Solutions, E-commerce, colliaziuns a bancas da datas), manader da raits da cabel (communicaziun a bindel lad, High Speed Internet) e NewMEDIACompany (applicaziuns multimedialas, Web Publishing).
In ulteriur accent è l'intermediaziun d'infurmaziuns concernent las pussaivladads da scolaziun e furmaziun supplementara. Quest sectur vegn tgirà tras la societad per promover professiuns d'electronica e d'informatica e da la scola professiunala da Cuira cun agid da la scola media commerziala d'informatica.
L'exposiziun speziala "digital world" stat sut il patrunadi dal chantun Grischun, represchentà tras il departament da l'intern e da l'economia publica (DIEP). L'engaschament sa basa sin il program da la regenza 2001 fin 2004 che prevesa tranter auter la promoziun da novas tecnologias d'infurmaziun e communicaziun. Las tecnologias d'infurmaziun e communicaziun furman in factur impurtant dal lieu e gidan a determinar il svilup futur. Il Grischun duai perquai crear la colliaziun cun il mund digital e gidar a furmar il futur.
Cun la preschentaziun a la HIGA da quest onn duai vegnir realisà in emprim pass da la strategia da promoziun. I na basta d'extender be l'infrastructura, ins sto plitost promover sistematicamain las persunas che fan diever da questas tecnologias. La finamira è quella da motivar dapli persunas per ina scolaziun sin il sectur da las novas technologias d'infurmaziun e da communicaziun e d'augmentar il potenzial da forzas da lavur en questas branschas. Ins vul surtut plidentar persunas che s'interessan per ina scolaziun e furmaziun supplementara sin il champ da questas tecnologias empermettentas. Surtut giuvenils che termineschan il temp da scola obligatori e ston eleger ina professiun duain vegnir intimads tras preschentaziuns dals mastergns correspundents e da las pussaivladads da furmaziun. Tgi che visitescha la HIGA resp. l'exposiziun speziala "digital world" po s'infurmar davart las novas pussaivladads d'infurmaziun e da communicaziun e da far experientschas praticas activas. En occasiun da l'exposiziun speziala "digital world" èn planisadas ulteriuras acziuns sin ils secturs menziunads. Per giuvenils tranter 14 e 18 onns èn preparadas 1000 entradas gratuitas. Els pon retrair quellas entradas en l'internet sut www.higa.ch.
Infurmants -
Sandro Gämperle, servetsch da pressa HIGA, Aquasanastrasse 8, 7000 Cuira, tel. 081-258 32 00, e-mail: gaemperle@ggskom.ch -
Beat Ryffel, secretari dal departament, departament da l'intern e da l'economia publica dal Grischun, Reichsgasse 35, 7000 Cuira, tel. 081-257 23 12, e-mail: Beat.Ryffel@dsdiv.gr.ch

Gremi: departament da l'intern e da l'economia publica dal Grischun
Funtauna: rg departament da l'intern e da l'economia publica dal Grischun