Navigation

Inhaltsbereich

  • Erste Mitteilung
  • Neuen Beitrag einfügen

Enfin uss ...
Ils onns 1996/97 han ins introducì cun sustegn dal chantun Grischun servetschs linguistics organisads sin basa regiunala. La finamira è stada da porscher in sustegn linguistic a las vischnancas e regiuns che han fixà il rumantsch sco lingua uffiziala e da scola. Concret hai dà trais posts da translaziun regiunals, manads da la Pro Engiadina Bassa/Val Müstair, da la Romania/Renania e da l'Uniun rumantscha da Surmeir.

Reorganisaziun
En il decurs da l'onn 2000 è il servetsch linguistic regiunal vegnì reorganisà sut il num "Sling". Finamira da la restructuraziun è da render pli enconuschent la purschida dal servetsch linguistic ed en spezial da garantir l'accessibladad da texts da model rumantschs ch'èn gia avant maun.
Purtaders dal servetsch linguistic reorganisà èn vinavant la confederaziun ed il chantun Grischun. Per incumbensa da quels (en furma d'in mandat da prestaziun) presta la Lia rumantscha il servetsch cun agid d'ina rait da collavuraturas e collavuraturs en las regiuns.

Finamira ed intent
Il servetsch linguistic duai facilitar l'applicaziun dal rumantsch e rinforzar sia preschientscha.
Il servetsch linguistic porscha support linguistic en tut ils idioms e rumantsch grischun

- ad instituziuns publicas (vischnancas, circuls, districts ed autras corporaziuns publicas)
- ad organisaziuns privatas e manaschis da vasta muntada en la regiun (posta, bancas, spitals regiunals, ovras electricas, uffizis da turissem e.u.v.).

Quest sustegn linguistic vegn prestà en furma da cussegliaziuns linguisticas en general, da lectorats e da translaziuns.
Per instituziuns publicas èn las prestaziuns da princip gratuitas. Per instituziuns privatas po il servetsch vegnir fatg dependent d'ina participaziun adequata als custs.

Sling en l'internet
La purschida dal servetsch linguistic sa basa sin la homepage www.sling-online.ch che pussibilitescha l'access ad ina collecziun da texts uffizials da model ed autras purschidas che faciliteschan l'applicaziun dal rumantsch.
Ils texts ch'èn accessibels via la pagina-web pon directamain vegnir chargiads sin l'agen computer - gratuitamain!
Dumondas per cussegliaziun linguistica, lectorat e translaziun pon vegnir inoltradas directamain sur la pagina-web.
Tut las purschidas e prestaziuns èn s'enclegia er accessiblas senza access a l'internet.

Per infurmaziuns: -
Andreas Gabriel, Lia rumantscha, manader da project "Sling", Via da la Plessur 47, 7001 Cuira, Tel. 081-258 32 12 -
Ivo Berther, DECA, referendari per dumondas da lingua, Quaderstr. 17, 7001 Cuira, Tel. 081-257 27 15


Gremi: Departament d'educaziun, cultura e protecziun da l'ambient dal Grischun
Funtauna: rg Departament d'educaziun, cultura e protecziun da l'ambient dal Grischun

Neuer Artikel