Il chantun vuless augmentar la quota da dunnas en l'administraziun chantunala. L'uffizi da persunal e d'organisaziun ed il biro d'egualitad vegnan incumbensads da concretisar e realisar mesiras correspundentas.
Gia 1993 ha la gruppa da lavur per dumondas da dunnas publitgà in rapport davart la situaziun da la dunna en l'administraziun chantunala. Quest rapport demussava in basegn d'agir en differents secturs. La situaziun è bain sa meglierada en tscherts secturs, ma il tema equalitad da las schanzas dumonda anc adina stentas spezialas, uschia ch'el vegn puspè reprendì.
La moda da proceder, cun la quala ins vul realisar l'egualitad da las schanzas da dunnas ed umens, prevesa essenzialmain las suandantas mesiras: -
Finamiras da la regenza envers las persunas directivas.
- Annualmain ccurrenzas d'infurmaziun, da sensibilisaziun e da furmaziun supplementara per superiurs da tut ils stgalims.
- Augmentar la quota da dunnas en secturs, en ils quals las dunnas èn sutrepreschentadas.
- Las publicaziuns da plazzas sa drizzan adina a dunnas ed umens.
- A la procedura d'elecziun vegn ad avair effect l'uschenumnada regla da preferenza, q.v.d. dunnas medemamain qualifitgadas vegnan engaschadas uschè ditg cun preferenza, fin che lur sutrepreschentanza en il sectur respectiv è cumpensada.
- Pretaisas sco l'abilitad da lavurar en in team, il dun da tractar e l'experientscha da la vita che qualifitgescha per la plazza pon obtegnair la medema paisa sco qualificaziuns directivas, forza da persvader u experientscha professiunala da plirs onns.
- Plazzas da cader che vegnan libras vegnan examinadas en quel senn, sch'ellas pon vegnir divididas en duas plazzas a temp parzial.
- Las dunnas duain vegnir appelladas cun cleras finamiras a lur schanzas da far carriera. Eventualmain èsi d'elavurar cun ellas plans individuals per lur carriera.
Il project equalitad da las schanzas è da chapir sco mussavia ed el è vegnì concepì er per vegnir realisà a pli lunga vista. Las singulas mesiras vegnan prendidas successivamain. L'uffizi da persunal e d'organisaziun vegn incumbensà da concretisar e realisar las mesiras correspundentas en collavuraziun cun il biro d'egualitad. Qua ha l'administraziun chantunala sco pli gronda patruna dal Grischun funcziun da model. D'esser ina patruna attractiva daventa pli e pli in avantatg en la concurrenza.
30.5 pertschient da las emploiadas e dals emploiads chantunals èn dunnas. Ina gronda part da las dunnas sa chatta en classas da paja pli bassas. Sin il plaun dal cader èn las dunnas l'excepziun (en il cader superiur 6.8 pertschient resp. 5 da 73, en il cader mesaun 12.3 pertschient resp. 89 da 725). La definiziun da funcziuns da cader cumpiglia lavur directiva e/u da stab.

Da las vischnancas
La nova lescha davart las taxas da cura e la taxa per promover il turissem da Sursaissa vegn approvada.
La constituziun communala da Rossa vegn approvada cun resalvas.
Per differents projects da construcziun da vias en il chantun vegnan dads libers credits d'ina summa totala da 4.45 milliuns francs (amplificaziun da la via chantunala davent da la punt dal Rain fin a la plazza da parcar Calanda incl. trottuars e fermada dal bus a Favugn, amplificaziun da la via chantunala e sanaziun dals conducts d'ovra entaifer il vitg da Trimmis, amplificaziun da la via chantunala e novs trottuars a Claustra-Serneus, mantegniment da la via chantunala Sorte-Piani di Verdabbio e correctura da la via dal Güglia en ils conturns da Crap Sés).

Chanzlia chantunala dal Grischun
Gremi: regenza
Funtauna: rg chanzlia chantunala dal Grischun