Navigation

Inhaltsbereich

  • Erste Mitteilung
  • Neuen Beitrag einfügen
Ils 15 da matg 2001 vegn preschentada a Cuira ina impurtanta nova publicaziun sin il sectur da la perscrutaziun da l'istorgia grischuna. I sa tracta dal tom IV dal cudesch da documents grischun, ina ovra fundamentala davart l'istorgia medievala grischuna.
L'onn 1937 ha la societad istorica antiquara dal Grischun concludì d'edir ils documents che pertutgan il Grischun davent da l'origin da l'uvestgieu da Cuira enturn l'onn 400 fin als artitgels da Glion da 1526. L'onn 1955 è cumparì l'emprim tom dal cudesch da documents grischun, redigì d'Elisabeth Meyer-Marthaler e da Franz Perret cun ils documents da 390 fin 1199, e l'onn 1973 è suandà il segund tom che cumpiglia il temp da 1200 fin 1273. A l'entschatta dals onns settanta han ins suspendì l'activitad editoriala.
Il cudesch da documents grischun è restà er vinavant in grond desideri da la perscrutaziun istorica. Sin proposta da la societad istorica antiquara dal Grischun ha la regenza grischuna concludì l'onn 1989 da cuntinuar cun l'ovra. Per quest intent ha ella creà la plazza d'in collavuratur scientific tar l'archiv chantunal. Quella plazza è vegnida occupada l'onn 1991 cun Lothar Deplazes. Sco collavuratur è vegnì engaschà Otto P. Clavadetscher. La finanziaziun dal cudesch da documents grischun succeda entras il chantun Grischun ed entras considerablas contribuziuns dal fond naziunal svizzer per la perscrutaziun scientifica, da la citad da Cuira e da la societad istorica antiquara dal Grischun. Editur è l'archiv chantunal dal Grischun.
Il preschent tom IV dal cudesch da documents grischun cuntegna ils documents che pertutgan il territori dal chantun Grischun da 1304 - 1327. Il material deriva da 97 archivs da la Svizra e da ses pajais vischins. Ils redacturs han surprendì essenzialmain il plan d'ediziun dal "Chartularium Sangallense" ch'è sa cumprovà. En furma da text integral èn stampads documents ch'han in emettur u retschavider grischun u dals quals ils objects giaschan en il chantun Grischun. En furma da regestas èn edids ils documents che menziunan perditgas grischunas, garants u lieus d'emissiun grischuns u sumegliantas chaussas. Ils texts vegnan producids tenor la meglra tradiziun, sco quai ch'ils princips moderns d'ediziun pretendan. Il commentari da materias, surtut l'identificaziun da las persunas e dals lieus, è per part da caracter provisori e na duai betg anticipar la perscrutaziun specifica. Ins vul cuntanscher ina solida ovra da funtaunas che serva tant a l'istorgia grischuna sco er a la medievistica internaziunala.
Enturn 1300 vegn il territori grischun dominà sper l'uvestg cun ses domini che s'extenda sur las Alps ora da numerus signurs feudals seculars ed ecclesiastics sco represchentants da la suveranitad. Quels èn avant las dretgiras, ils vischinadis e las persunas singulas ils pli impurtants purtaders da la tradiziun scritta en documents. En quest connex dominescha en il sid l'act notaril si da l'Italia ed en il nord la pergiamina da sigil. Davent dal 13avel tschientaner cumparan ils documents da furma maschadada da l'Engiadina ed ils documents tudestgs scrits oravant tut dals scrivants da l'uvestg. La diversitad territoriala, politica e culturala dal territori retic cundiziunescha la multifariadad da las funtaunas en scrit che giustifitgeschan er vinavant in interess spezial da la perscrutaziun.
Bündner Urkundenbuch, tom IV, 1304-1327, redigì dad Otto P. Clavadetscher e da Lothar Deplazes, edì da l'archiv chantunal dal Grischun, Cuira 2001
Sperrfrist: Dienstag, 15. Mai 2001, 15 Uhr!

Gremi: Archiv chantunal dal Grischun
Funtauna: rg Archiv chantunal dal Grischun
Neuer Artikel