La versiun existenta dal portafegl da las linguas per giuvenils e creschids ch'è vegnì lantschà da la conferenza svizra dals directurs d'educaziun (CDE) na vegn per entant betg introducida en il Grischun. Il chantun desista d'introducir spert il portafegl da las linguas, perquai che la versiun svizra dal portafegl europeic da las linguas excluda la lingua naziunala rumantscha.
Il 1. da mars 2001 ha la CDE preschentà a la publicitad la versiun svizra dal protafegl europeic da las linguas per giuvenils e creschids sur 16 onns. Quest portafegl da las linguas cumpiglia er in passaport linguistic che dat infurmaziuns davart las enconuschientschas individualas da las linguas. Ina impurtanza cardinala duai il portafegl da las linguas obtegnair spezialmain per realisar las recumandaziuns planisadas da la CDE pertutgant l'instrucziun da las linguas. La CDE recumonda als chantuns d'introducir il portafegl da las linguas ch'exista en las linguas tudestg, franzos, talian ed englais.
Envers la confederaziun ha la regenza dal chantun Grischun exprimì sia surpraisa che la preschenta versiun dal portafegl da las linguas excluda il rumantsch, schebain ch'il departament d'educaziun, cultura e protecziun da l'ambient aveva postulà gia baud l'integraziun dal rumantsch en il portafegl da las linguas. La reacziun da la CDE a la charta da la regenza mussa che la CDE è pronta, ensemen cun il chantun Grischun, d'elavurar ina schliaziun che resguarda il rumantsch en il portafegl da las linguas per giuvenils e creschids.
Il departament d'educaziun, cultura e protecziun da l'ambient vul desister d'introducir la preschenta furma dal portafegl da las linguas per giuvenils e creschids en il chantun Grischun, fin ch'igl exista ina versiun che cumpiglia er il rumantsch. Suenter ch'ina versiun dal portafegl da las linguas cun il rumantsch è avant maun, duai il portafegl da las linguas vegnir introducì e duvrà er en il chantun Grischun.
En preparaziun è actualmain il portafegl da las linguas "Junior". La CDE ha recepì in represchentant dal chantun Grischun en la gruppa directiva, uschia ch'igl è garantì ch'il rumantsch vegn resguardà da l'entschatta ennà en l'elavuraziun da questa versiun dal portafegl da las linguas per la scola populara.

Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient