Navigation

Inhaltsbereich

  • Erste Mitteilung
  • Neuen Beitrag einfügen
Dapi l'onn 1997 mintgamai la stad vegnan tschertgads fossils sin la furcla dal Duncan. Ils chats da fin uss èn spectaculars. Las lavurs cuntinueschan la stad 2001.
La crappa da sediment en il territori da la chadaina dal Duncan e da la Landwasser sin il territori communal da Tavau cuntegnan restanzas petrifitgadas d'animals e da plantas ch'èn fitg bain mantegnidas. Ils fossils da peschs cun restas, reptils, animals senza spina dorsala e da plantas derivan dal trias mesaun marin. Els èn pia var 230 milliuns onns vegls e da grond interess per la scienza. La stad 1997 ha entschavì l'institut e museum paleontologic da l'universitad da Turitg a far exchavaziuns sistematicas. Il fratemp han ins chattà spezialmain peschs sco er in saur marin pli pitschen. Ils chats da las uschenumnadas stresas prosanto èn da muntada internaziunala. Els vegnan preparads da spezialists ed elavurads scientificamain. Differentas giadas èsi vegnì rapportà en las medias davart las exchavaziuns ed en il pavigliun svizzer da l'exposiziun mundiala a Lissabon è vegnida mussada ina copia d'in pesch fossil ch'ins aveva chattà al Duncan. Il material chattà è proprietad dal chantun Grischun. Er la stad 2001 vulan ins cuntinuar a tschertgar fossils. Cur che las exchavaziuns èn terminadas ed ils chats evaluads scientificamain, duain vegnir preschentads ils resultats ils pli impurtants en ina exposiziun ambulanta ed en ina broschura illustrada fatgas en collavuraziun cun il museum grischun da la natira. Per l'exchavaziun planisada 2001 conceda la regenza ina contribuziun da 6'500 francs a l'institut e museum paleontologic da l'universitad da Turitg, e quai per ils custs da viadi, l'alloschi, l'alimentaziun, il material da lavur e per ils transports cun il helicopter. L'universitad da Turitg da sia vart surpiglia ils custs da las pajas per las lavurs champestras e per l'evaluaziun dals chats silsuenter. L'ulteriura perscrutaziun da las plazzas cun fossils sin la furcla dal Duncan è er d'interess per il chantun Grischun, perquai ch'ils chats permettan da far deducziuns davart la vita da lezza giada e davart la furmaziun geologica da noss chantun.

Vischnancas

Il project da construcziun per sanar ed engrondir il center dal stgalim superiur Tircal a Domat vegn approvà. El cumpiglia la renovaziun da la chasa da scola Tircal 48 ed in engrondiment dal local dals pumpiers. Als custs imputabels da 2.45 milliuns francs vegn empermessa ina contribuziun chantunala da 17.5 pertschient.
La renovaziun da la scola primara da Tinizong-Rona vegn approvada. Als custs imputabels da 60'000 francs vegn empermessa ina contribuziun chantunala da 25 pertschient.

Persunal

La fin da matg 2001 van las suandantas emploiadas ed ils suandants emploiads chantunals en pensiun:
- Martina Caduff, Panaduz, tgirunza da psichiatria en la clinica Beverin,
- Hans Gerber, Tumein, polizist chantunal,
- Santino Grossi, Cuira, polizist chantunal, e
- Alois Schrofer, Trimmis, revisur tar l'inspecturat da vischnancas.
La regenza als engrazia per ils servetschs ch'els han prestà en favur dal chantun.
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel