Sco ch'ins sa è vegnida midada la candidatura per l'Olimpiada
Turitg/Grischun en la candidatura Tavau 2010 (Grischun - Turitg - Sviz).
Il nov dossier da candidatura vegn inoltrà il pli tard la fin da
zercladur a Swiss Olympic. Il chantun al sustegna en la medema furma sco
il project oriund.
A la fasa internaziunala da candidatura che dastgass avair in
preventiv da totalmain 14 milliuns francs, duain ils chantuns e las
vischnancas participads conderscher 2.4 milliuns francs. Sa basond sin
la repartiziun dals aspectaturs e dals effects economics sco er
resguardond in supplement da host-city ha la task force fixà la
suandanta clav da repartiziun dals custs: Grischun 1.5 milliuns francs,
Turitg 600'000 francs, Sviz 300'000 francs. La task force propona da
subdivider la part dal Grischun sco suonda: chantun 1.2 milliuns francs
(medema summa sco a la candidatura da Turitg) e Tavau sco host-city
300'000 francs. Igl è commensurà da sustegnair la candidatura da Tavau
cun il medem import sco l'anteriura candidatura da Turitg/Grischun. La
regenza empermetta ina contribuziun dad 1.2 milliuns francs a la fasa
internaziunala da candidatura, premess ch'il parlament da sport sa
decidia per la candidatura da Tavau 2010. Resalvada resta la concessiun
dals credits necessaris tras il cussegl grond. Plinavant è la regenza
pronta d'examinar a temp util las prestaziuns en daners e materialas per
realisar l'Olimpiada d'enviern 2010 en ils chantuns Grischun, Turitg e
Sviz. Ella fa quai sche la candidatura da Tavau 2010 survegn
l'agiudicaziun dal Comité olimpic internaziunal.
L'october 2000 aveva la regenza empermess a la candidatura
Turitg/Grischun per l'Olimpiada d'enviern 2010 ina contribuziun dad 1.2
milliuns francs en favur da la fasa internaziunala da candidatura,
sch'il parlament da sport fiss sa decidì per questa candidatura. Ultra
da quai era la regenza sa declerada pronta d'examinar da surprender ina
garanzia da deficit per organisar l'Olimpiada d'enviern. Il december
2000 ha il cussegl executiv da Swiss Olympic returnà il dossier per al
repassar. Per satisfar a las prescripziuns da Swiss Olympic ha la task
force restructurà la candidatura olimpica. Tavau è vegnì mess en il
center da la candidatura sco uschenumnada host-city. Il nov dossier da
candidatura porta dapi lezza giada il titel Tavau 2010
(Grischun-Turitg-Sviz). Ils suandants lieus d'occurrenza èn previs:
- Tavau sco host-city (festa d'avertura e finala, passlung, biatlon,
freestyle, snowboard, cursa da patins)
- San Murezzan (bob, scarsolar, skeleton)
- Flem/Laax (ski alpin, disciplinas speed)
- Lai/Parpan (curling, ski alpin disciplinas tecnicas)
- Cuira (patinagi artistic, short-track)
- Nossadunaun (cumbinaziun nordica, sigl cun skis)
- Turitg/Kloten/Bülach (hockey sin glatsch, congress COI)
Scolaziun per direcziuns da scola
L'impurtanza da direcziuns da scola è s'augmentada ferm. Surtut
scolas pli grondas èn dependentas d'ina atgna direcziun per vegnir a
frida cun las incumbensas multiplas. Ma er scolas mesaunas e pli
pitschnas tschertgan pussaivladads per pudair surdar lur incumbensas
administrativas e pedagogicas (per part communablamain) a direcziuns
professiunalas. Tut las furmas da direcziuns da scola han ina basa
communabla. Quella po vegnir elavurada professiunalmain en il rom d'ina
scolaziun per direcziuns da scola. A partir da l'atun 2001 po la
scol'auta professiunala da pedagogia a Cuira offrir in curs da scolaziun
correspundent. Quel dura totalmain 33 dis e vegn repartì en tschintg
emnas ed otg dis singuls da curs sin dus onns. La scolaziun terminescha
cun in certificat. Ils custs totals per persuna muntan a var 15'000
francs. Il chantun surpiglia in terz da quels, il rest vegn purtà da la
persuna che sa participescha al curs e dals purtaders da la scola
respectiva. Cun la resalva ch'il cussegl grond acceptia il project, vegn
permessa ina contribuziun da 120'000 francs per la scolaziun da
direcziuns da scola planisada durant ils onns 2002 fin 2003.
L'uffizi d'informatica duai amplifitgar il support da PC en l'administraziun
Fin uss vegniva garantì il support da PC en l'administraziun
chantunala da singuls uffizis u da firmas externas da EED. Quai duai uss
sa midar per part, en quel senn che l'uffizi d'informatica (UI)
furnescha il support per scadin uffizi ch'ha annunzià in basegn
respectiv. I sa tracta ensemen cun ils PCs assistids gia oz da var 500
clients da PC (var in tschintgavel da tut ils PCs da l'administraziun).
Per ch'ins possia furnir questas prestaziuns da servetsch, èn da crear
quatter plazzas supplementaras en l'UI. La regenza suttametta ina
missiva correspundenta al cussegl grond che cumpiglia il rapport
cumplessiv davart las incumbensas ed il support dals uffizis tras l'UI,
sco ch'ella era vegnida pretendida en la sessiun da schaner 2001 dal
cussegl grond.
Nova politica grischuna da vegliadetgna davent dal schaner 2002
Las votantas ed ils votants grischuns han acceptà il mars ina
revisiun parziala da la lescha davart la tgira da malsauns. Cun quella
obtegna la nova orientaziun da la politica chantunala da vegliadetgna
ina basa legala. Las novaziuns vegnan messas en vigur sin l'entschatta
2002.
7.7 milliuns francs per la tgira grischuna dal guaud giuven
La regenza approva il project per l'entir chantun "tgira dal guaud
giuven 2001" cun custs totals da bunamain 7.7 milliuns francs. Da vart
dal chantun vegnan empermessas contribuziuns da pressapauc 1.6 milliuns
francs. Il probabel retgav or da vendita da la laina vegn stimà sin var
1.8 milliuns francs. Il project ha las suandantas finamiras:
- Mantegnair e promover guauds stabils cun maschaidas da spezias da
plantas confurmas al lieu e da buna qualitad.
- Mantegnair e promover spazis da viver natirals, ritgs da spezias e
variads en il guaud sco er furmas da cultivaziun forestalas ed agriculas
impurtantas per la scienza.
- Purschida da pastgira e da cuvrida en ils territoris, nua che la
selvaschina passenta l'enviern.
Regiuns e vischnancas
Il plan directiv regiunal "implant da golf Claustra" vegn approvà e
declerà impegnativ per las autoritads.
Il project preliminar per l'engrondiment e la renovaziun da la chasa
da scola a Stampa vegn approvà da princip. Als custs imputabels da var
1.6 milliuns francs vegn empermessa ina contribuziun chantunala da 21
pertschient.
Il project repassà per la construcziun nova da la basa cun
administraziun a Glion vegn approvà. Il credit impegnativ permess per il
project da construcziun da brutto 14.86 milliuns francs vegn dà liber en
il rom dals credits dal preventiv permess.
Persunal
Jürg Alder, naschì 1974, da Schönengrund AR, domicilià a Cuira,
daventa collavuratur giuridic cun in pensum parzial tar l'administraziun
da taglia. El cumenza l'entschatta d'avust 2001.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun