L'organisaziun grischuna per asilants envida sonda, ils 16 da zercladur 2001, tut las persunas interessadas ad ina visita en in center transitori a la Loestrasse 26. La sera datti in concert en la sala Loe cun in program da musica varià ed internaziunal.
Sco gia dapi onns vegnan ad esser represchentads al di internaziunal dals fugitivs requirents d'asil ed assistentas ed assistents dal center transitori a Cuira cun in stand sin la plazza Son Martin a Cuira. Quest onn preschenta l'organisaziun grischuna per asilants plinavant in program zunt spezial.
Dapi il favrer 2001 è il center transitori Loestrasse 26 puspè en funcziun suenter lavurs da sanaziun da bunamain in onn. Il di internaziunal dals fugitivs ch'ha la devisa "RESPECT" offra in rom ideal per in di da las portas avertas. A partir da las 17 pon las persunas interessadas prender invista en il mintgadi dals requirents d'asil che vivan en in center transitori. Ina projecziun da dias davart il tema migraziun, fugia ed asil envida ad approfundar las impressiuns cun infurmaziuns da basa.
A las 18 s'avran las portas da la sala Loe per ir sin in viadi musical e culinaric. Ils requirents d'asil da tut ils centers transitoris en il chantun vegnan a preparar in ritg buffet cun spezialitads da Sri Lanka, Iran, Turchia, Bosnia, Libia, Kosovo ed Africa. A las 19 entschaiva il program musical cun Bettina W. Portmann sin instruments da corda indics. Mactar, Abdou e Chian vegnan a procurar per atmosfera cun percussiun africana. In giast da surpresa vegn ad arrundar il program musical da la sera.

Gremi: uffizi dal servetsch social dal Grischun
Funtauna: rg uffizi dal servetsch social dal Grischun