La cumissiun predeliberanta dal cussegl grond sut il presidi da Mario Cavigelli (PCD) è s'occupada en duas sesidas salvadas en preschientscha da cusseglier guvernativ Peter Aliesch dal project da lescha preschentà da la regenza per l'organisaziun dals servetschs psichiatrics chantunals en il chantun Grischun. Ella beneventa l'intenziun da la regenza d'excorporar las clinicas psichiatricas chantunalas e las chasas chantunalas da dimora per umans cun impediments psichics or da l'administraziun chantunala e da las transferir en in institut autonom dal dretg public chantunal. La cumissiun predeliberanta è da la medema opiniun sco la regenza che la furma organisatoria da quests manaschis sco uffizis administrativs fetschia daventar adina pli difficil da dumagnar las cundiziuns generalas che sa midan permanentamain dapi intgins onns. Cun transferir ils manaschis en in institut giuridicamain autonom duain vegnir creadas las premissas per che las clinicas psichiatricas e las chasas da dimora per umans cun impediments psichics possian vegnir manadas tenor princips economics, e quai per pudair garantir er en il futur in provediment psichiatric e socialpedagogic optimal da la populaziun dal chantun tras meds finanzials limitads. Tenor la maioritad da la cumissiun duai l'ordinaziun dal persunal valair be enfin che la cumissiun administrativa relascha directivas per las cundiziuns d'engaschament dal persunal. La maioritad è da l'avis che l'ordinaziun chantunala dal persunal na resguardia betg ils basegns dals manaschis da sanitad. Ina minoritad da la cumissiun vul perencunter declerar l'ordinaziun dal persunal sco obligatoria er per il persunal da l'institut. Regulaziuns divergentas duain vegnir admessas be, sch'ellas vegnan accordadas en il rom da contracts collectivs da lavur tranter ils partenaris socials. Cuntrariamain a la proposta da la regenza na duai l'institut betg vegnir suttamess a la surveglianza da finanzas da la controlla chantunala da finanzas, tenor l'opiniun da la maioritad da la cumissiun. La maioritad da la cumissiun è da l'avis ch'a la regenza stettia a disposiziun in instrumentari suffizient per survegliar l'institut grazia a ses dretg general da surveglianza.
Per che ultra da las clinicas psichiatricas possian vegnir transferidas en il nov institut er las chasas da dimora per umans cun impediments psichics, e quai sco sectur d'interpresa independent, propona la cumissiun al cussegl grond d'adattar correspundentamain il titel ed il champ d'applicaziun da la lescha.

Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond