Durant il proxim onn da scola vegn da nov organisada ina retschertga
da scolaras e scolars da 11 fin 16 onns da las tschintgavlas fin
novavlas classas davart lur cumportament concernent la sanadad. Il post
spezialisà svizzer per problems d'alcohol e d'autras drogas realisescha
talas retschertgas mintga quatter onns.
En il Grischun vegn organisada l'onn proxim ina retschertga
fundamentala ed ina retschertga supplementara specifica. Ella s'occupa
dal cumportament concernent il consum e la ristga da giuvenils, surtut
concernent l'alcohol ed il tubac. En il davos temp pon ins constatar
ch'il consum da questas drogas è s'augmentà considerablamain tar ils
giuvenils. Ils resultats da la retschertga permettan ina bilantscha
cumplessiva e represchentativa da la sanadad da scolaras e scolars sco
er ina cumparegliaziun cun il svilup durant ils onns precedents. Ultra
da quai dattan els indicaziuns impurtantas per la politica da sanadad
chantunala sco er per la promoziun specifica da la sanadad en il sectur
da scola e temp liber. La retschertga vegn finanziada per gronda part da
l'uffizi federal da sanitad. Ils custs restants sco er ils custs per la
retschertga supplementara specifica per il Grischun muntan a 36'000
francs che vegnan repartids sin il departament d'educaziun, cultura e
protecziun da l'ambient ed il departament da giustia, polizia e sanitad,
sch'il cussegl grond approva il preventiv 2002.
29/30 da zercladur: cursa aval e maraton sin inline-skates en
Engiadina
En Engiadin'ota ha lieu proximamain la sisavla ediziun dal maraton
da stad per inline-skates. La regenza dat la permissiun necessaria.
L'occurrenza da dus dis cumpiglia il venderdi, ils 29 da zercladur ina
cursa downhill cun inline skates (cursa aval) a San Murezzan e la sonda,
ils 30 da zercladur il maraton inline che maina, analog al maraton
engiadinais da passlung d'enviern ,da Maloja fin a S-chanf. La cursa
downhill da venderdi entschaiva a las 19.30 tar la chasa da scola a San
Murezzan Vitg. Il traject maina sur la Via dal Bagn fin a San Murezzan
Bagn. La partenza per il maraton inline ha lieu sonda a las 16.45 tar il
hotel Maloja Palace a Maloja, l'arriv sa chatta sin la via da sviament
sper S-chanf.
Da las regiuns e vischnancas
Il project da construcziun per l'engrondiment e la renovaziun da la
scola e da la scolina da Valendau vegn approvà. Als custs imputabels da
circa 1.1 milliuns francs vegnan garantidas contribuziuns chantunalas da
40 pertschient.
Il project per la renovaziun e construcziun nova dal center da sport
Mulets a Silvaplauna vegn approvà sin il sectur da scola. Als custs
imputabels da 310'000 francs vegn garantida ina contribuziun da
construcziun da diesch pertschient.
Per differents projects da vias en il chantun vegnan mess a
disposiziun credits en la summa totala da bunamain 1.9 milliuns francs
(installaziuns da current ad auta tensiun per la sanaziun dal tunnel dal
San Bernardin, sendas da viandar e fermada dal bus a Schlarigna).
Fatgs dal persunal
Jan Laperre-Rauch, naschì 1967, da Gent (Belgia), domicilià a
Valbella, daventa manader dal convict a partir da l'entschatta avust.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun