La planisaziun d'ospitals dal Grischun e la glista d'ospitals èn deliberadas
- Seiteninformationen
- Erste Mitteilung
- Neuen Beitrag einfügen
La regenza ha deliberà la planisaziun d'ospitals 2002 dal chantun Grischun e la glista d'ospitals respectiva. Tut en tut han retschavì 54 ospitals e clinicas entaifer ed ordaifer il chantun in mandat da prestaziun. La planisaziun d'ospitals registrescha las prestaziuns, per las qualas ha da star bun l'assicuranza obligatoria per la tgira da malsauns. La glista d'ospitals va en vigur per il 1. da fanadur 2002.
La lescha federala davart l'assicuranza da malsauns (LAM) das l'onn 1994 oblighescha ils chantuns da far ina planisaziun per in "provediment d'ospital confurm al basegn". L'obligaziun da planisaziun dals chantuns cumpiglia sulettamain las prestaziuns en il sectur staziunar, per las qualas ha da star bun l'assicuranza obligatoria per la tgira da malsauns. Exceptads da l'obligaziun da planisaziun èn er il sectur parzialmain staziunar ed il sectur ambulant. Sa basond sin la planisaziun d'ospitals han ils chantuns da cumpilar ina glista d'ospitals. La glista d'ospitals infurmescha, tge clinicas e tge ospitals ch'èn autorisads da far giu quint davart prestaziuns fatgas en favur dals abitants dal chantun a quint da l'assicuranza obligatoria per la tgira da malsauns.
Survista da la planisaziun d'ospitals
Tar la planisaziun d'ospitals sa tracti da garantir il provediment medicinal staziunar da la populaziun. Per quest intent han ils chantuns da dar mandats da prestaziun detagliads als ospitals ed a las clinicas entaifer ed ordaifer il chantun che fan basegn per cuvrir il basegn. Correspundent al basegn èsi d'attribuir a mintga ospital ed a mintga clinica in dumber fix da letgs per tractar ils assicurads LAM.
Tut en tut ha la regenza dà in mandat da prestaziun a 54 ospitals e clinicas - 29 da quels en il Grischun - en ils secturs medischina somatica acuta, psichiatria e reabilitaziun. La planisaziun d'ospitals 2002 parta dal fatg ch'i vegn a duvrar per il 1. da fanadur 2003 tut en tut 625 letgs en il sectur da la medischina acuta somatica da las dudesch regiuns d'ospital dal chantun per tractar pazients LAM e per garantir il provediment medicinal staziunar dals indigens e dals giasts. En il sectur da la psichiatria munta il basegn correspundent a 204 letgs, en il sectur da la reabilitaziun a 62 letgs. Fin il 2005 - uschia prevesa la nova planisaziun d'ospitals - èn da reducir il sectur acut somatic per 24 letgs ed il sectur da psichiatria per quatter letgs. Ils mandats da prestaziun attribuids als ospitals da center ed als ospitals regiunals sco er a las ulteriuras clinicas s'orienteschan da princip tenor lur contribuziun da fin uss al provediment da la populaziun dal chantun.
Mandats da prestaziun clers
Il mandat da prestaziun da l'ospital chantunal e regiunal dal Grischun a Cuira è vegnì agumentà per il sectur spezial chirurgia plastica, quel da l'ospital da dunnas Fontana a Cuira per il sectur spezial senologia (malsognas dal sain feminin). A l'ospital da la Crusch a Cuira n'han ins dà pli nagin mandat da prestaziun per il sectur spezial urologia, perquai che l'ospital da la Crusch ha sin quest sectur custs considerablamain pli auts per ils singuls cas che l'ospital chantunal e regiunal dal Grischun. La regenza ha concedì a l'ospital da la Crusch in termin transitori d'in onn per liquidar l'urologia.
Analog a la glista d'ospitals da fin uss han ins dà in mandat da prestaziun per la chirurgia ortopedica tant a l'ospital d'Engiadin'auta a Samedan sco er a la clinica Gut a San Murezzan, quai en vista a la contribuziun da fin uss al provediment da la populaziun dal Grischun meridiunal. Medemamain han ins integrà l'ospital d'Engiadina bassa a Scuol en il provediment ortopedic dal Grischun dal sid. Tar l'ospital da la Crusch a Cuira han ins desistì d'in mandat da prestaziun per la chirurgia ortopedica, essend che l'ospital chantunal e regiunal dal Grischun a Cuira ch'è situà en vischinanza dispona d'ina chirurgia ortopedica abla da funcziunar.
Plaz d'ospitals Cuira e planisaziun successiva
La regenza è s'exprimida a moda clera concernent il plaz d'ospitals Cuira. Sch'ils sforzs da coordinar la purschida da prestaziuns tranter l'ospital chantunal, l'ospital da dunnas Fontana e l'ospital da la Crusch na duessan betg avair success, vegn la regenza ad optimar il plaz d'ospitals Cuira via ina midada dals mandats da prestaziun dals ospitals che sa basa sin la LAM.
Fin l'onn 2005 vegnan examinads annualmain las valurs da planisaziun (purschida e basegn dal provediment medicinal staziunar, frequenza d'ospitalisaziun, durada dal segiurn ed occupaziun dals letgs) en il rom da l'orizont da planisaziun da trais onns. En cas da relaziuns midadas vegn la regenza amidar il dumber da letgs e/u ils mandats da prestaziun.
Consequenzas per ils servetschs da spitex e las chasas da tgira
Tras ils sforzs dictads da la LAM da reducir la quantitad da letgs s'augmenta il dumber da las persunas cun basegn da tgira en il sectur da spitex ed en las chasas da tgira. Ils servetschs da spitex e las chasas da tgira vegnan eventualmain a stuair extender correspundentamain lur servetschs ed eventualmain stuair recrutar ulteriur persunal.
La planisaziun d'ospitals e la glista d'ospitals 2002 pon vegnir chargiads qua.
Planisaziun d'ospitals e la glista d'ospitals 2002 164 KB
Gremi: regenza
Funtauna: rg chanzlia chantunala dal Grischun
Neuer Artikel