La regenza grischuna sustegna da princip ina midada da la
legislaziun davart l'acquist da terren entras persunas a l'exteriur
(LABE) ch'il departament da giustia e polizia ha en egl. Il punct
principal da la revisiun da l'uschenumnada Lex Koller prevesa da
deliberar acquists da parts d'ina
societad immobigliara entras persunas a l'exteriur da l'obligaziun
da dumandar ina permissiun tenor LABE, sche las parts èn quotadas ad ina
bursa en la Svizra.
La regenza beneventescha ultra da quai expressivamain l'intenziun da
surlaschar als chantuns la designaziun dals uschenumnads lieus da
turissem, en ils quals esters pon acquistar abitaziuns da vacanzas u
unitads d'abitar en hotels d'appartaments. Uschia croda per las
vischnancas che na disponan betg d'in concept da svilup approvà en senn
dal dretg federal davart l'agid d'investiziun en territoris da muntogna
il duair da concepir ina planisaziun uffiziala equivalenta, quai ch'era
regularamain collià cun gronds custs e temp impundì.
En il rom da la revisiun da l'ordinaziun davart l'acquist da terren
entras persunas a l'exteriur (OABE) duain esters plinavant pudair
cumprar abitaziuns secundaras da vacancas ed abitaziuns da vacanzas pli
grondas ch'enfin uss. L'uschenumnada "norma-limit" duai ussa vegnir
auzada da 100 sin 200 m2. La regenza grischuna aveva gia animà en
anteriuras consultaziuns da far in'adattaziun da la prescripziun da la
surfatscha d'abitar.
Sennhof: approvà il project da construcziun ed il preventiv
La regenza grischuna ha approvà il project da construcziun per la
praschun preparatoria e da repatriament en la mesa-praschunia da la
praschun dal Sennhof. Il preventiv per quest project prevesa expensas
bruttas da var 1,9 milliuns francs.
La regenza aveva decidì ils 11 da fanadur 2002 da spezialisar las
duas praschuns dal Sennhof e da Realta: La purschida dal Sennhof duaja
sa concentrar sin l'execuziun dal chasti serrada e fermamain segirada.
Sper l'arrest d'inquisiziun e l'execuziun dal chasti serrada surpiglia
la praschun dal Sennhof perquai l'exequziun da l'arrest da repatriament.
L'instituziun da Realta percunter vegn incaricada cun l'execuziun da la
furma da l'execuziun dal chasti mez averta e main segira da la
construcziun sco er da la tecnica nà. L'execuziun mez averta ch'existeva
enfin ussa al Sennhof vegn abolida.
Contribuziuns dal chantun a differentas organisaziuns ed
instituziuns
- Sco contribuziun d'occurenza ha la regenza grischuna garantì a la
"Gruppa d'iniziativa dal Grischun per l'onn internaziunal da las
muntognas" 8500 francs. Questa contribuziun è liada al pajament da la
summa dal premi per il project "Premi per alpinists grischuns".
Da las vischnancas e regiuns
- Las cumpetenzas da la suprastanza communala da Pagig duajan vegnir
schlargiadas. Ussa ha er la regenza grischuna approvà la revisiun
correspundenta da la constituziun communala.
- La regenza è sa fatschentada cun la revisiun da la planisaziun
locala da la vischnanca da Claustra-Serneus. La zona da mastergn en il
territori da "Sagarain / Sagarüti" ch'è zavrada en il plan da zonas
1:2500 "Serneus, Mezzaselva" vegn approvada cun pretensiuns.
Persunal
Ludwig Decurtins, sesent a Cuira, è vegnì tschernì a l'inspecturat
dal register funsil dal Grischun sco inspectur dal register funsil.
Ludwig Decurtins cumenza sia nova plazza a l'entschatta da schaner 2003.
Chanzlia chantunala dal Grischun
Gremi: regenza
Funauna: rg chanzlia chantunala dal Grischun