Ils fatgs da furmaziun dal chantun Grischun s'adatteschan a las midadas socialas ed economicas e sa sviluppeschan vinavant dinamicamain. La scrittira d'infurmaziun " Rapport da furmaziun 2001" mussa en tge direcziun che sa movan la scola populara e las scolas cuntinuantas.
Per l'emprima giada è avant maun per il chantun Grischun in inventari recapitulond, che preschenta las numerusas tendenzas chantunalas e naziunalas dal svilup , ils projects da refurma ed ils projects sin il champ da la furmaziun en lur tratgs fundamentals. Il "Rapport da furmaziun 2001" stgaffescha transparenza ed infurmescha davart ils svilups sin il stgalim da la scolina, sin il stgalim da la scola populara, sin il stgalim secundar II, sin il stgalim terziar e sin il champ da la furmaziun dals creschids. La pli gronda part da la scrittira d'infurmaziun è deditgada a las tendenzas dal svilup ed a projects. Qua tras po il rapport da furmaziun daventar in med d'agid per ina "planisaziun rullanta" sin il champ da la furmaziun. Ils fatgs da furmaziun dal Grischun sa chattan generalmain en in bun stadi ed ils giuvenils dal Grischun èn en il cas da concurrer ed exister sin il champ social e professiunal. Ils svilups socials ed economics tschentan dentant ils fatgs da furmaziun avant numerusas sfidas, cun las qualas tuts participads han da sa fatschentar en l'interess da las Grischunas e dals Grischuns.
Il rapport da furmaziun fa er allusiun als svilups en auters chantuns ed en l'entira Svizra, essend che las tendenzas naziunalas han era consequenzas per ils fatgs da furmaziun dal Grischun.
Rinviament: La scrittira d'infurmaziun "Rapport da furmaziun 2001" po vegnir retratga da la centrala chantunala per stampats e material (CSM), Planaterrastrasse 16, 7000 Cuira, tel. 081-257 22 60.

Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient