La fin da zercladur va Erich Bandi, architect dipl. SPF/FAS/SIA suenter in'activitad da passa 26 onns sco schef da l'uffizi da construcziun auta dal Grischun en la pensiun meritada.

Dapi sia elecziun sco architect chantunal l'onn 1975 è stada marcada sia lavur da midadas permanentas en il sectur da la construcziun auta. Pretensiuns pli autas e spezialisadas dals bajetgs novs e dal mantegniment dals edifizis, ma er l'augment creschent cuntinuant da las plazzas da lavur en l'administraziun han gì per consequenza ch'el ha adina puspè pudì sa far valair cun sias excellentas enconuschientschas dal fatg sco er cun sia flexibilitad. Uschia è vegnida integrada l'administraziun da las immobiglias ch'era autonoma ord motivs dal fatg ed organisatoris en l'uffizi da construcziun auta. A las novas pretensiuns è el scuntrà fitg bain cun l'introducziun da la planisaziun dals spazis dals biros, l'informatica ed ulteriuras midadas persunalas ed organisatorias.

El è stà attaschà cun cor ed olma a l'architectura. Sia filosofia tar l'architectura ha el exprimì ina giada sco suonda: "Per mai stat l'impressiun dal spazi en il center da l'architectura; il pli impurtant è il spazi - uschebain l'intern sco l'extern - èn bellas ed empernaivlas successiuns da spazis. Ils detagls e l'elecziun dal material èn perencunter secundars e specifics al lieu ed a la funcziun. Sut qualitad è da chapir insatge positiv, prezius, nizzaivel e duraivel." Observond questa tenuta, dentant er resguardond ils aspects economics èn vegnids exequids sut sia direcziun cunzunt ils suandants projects gronds da construcziun sco la scola da dunnas grischuna, l'engrondiment dal bajetg da la polizia chantunala/uffizi per il traffic sin via, il tract da scienza natirala dal seminari da magisters grischun, ils lavuratoris da Tavau Frauenkirch, Samedan, Vicosoprano, Trin, Glion, la construcziun nova e la sanaziun da las clinicas psichiatricas Waldhaus e Beverin, la sanaziun e la restauraziun dal museum d'art dal Grischun, la sanaziun da l'ospital da dunnas Fontana, la praschun Sennhof e Realta ed anc bler dapli.

Ses princips per ils bajetgs dal chantun èn vegnids realisads, uschenavant che quai è stà pussaivel en il rom da las cumpetenzas da l'uffizi da construcziun auta, er tar ils bajetgs ch'èn vegnids subvenziunads dal chantun sco las chasas da scola, las scolinas, las chasas d'attempads e da tgira, ils spitals e.u.v.

A la concurrenza da planisar ha el adina puspè rendì gronda attenziun. Cun quest instrument da planisaziun n'han betg sulettamain pudì vegnir cuntanschids ils resultats ils megliers pussaivels, el ha er purschì la pussaivladad a giuvnas architectas ed a giuvens architects da cumprovar lur qualificaziuns. Sias enconuschientschas professiunalas en ils fatgs da concurrenza n'èn betg stadas dumandadas sulettamain en il Grischun, mabain er lunsch sur ils cunfins dal chantun ora. Uschia è el adina puspè vegnì clamà en giurias per projects da construcziun, cunzunt dal maun public.

En il sectur dal persunal ha Erich Bandi procurà per in bun spiert da cuminanza, el ha pretendì professiunalitad ed è stà senza resalva davos sias collavuraturas e ses collavuraturs. Che ses dun da manar è vegnì stimà zunt fitg da ses persunal sa mussa tranter auter en la fluctuaziun da persunal fitg pitschna en ses uffizi.

Erich Bandi dastga ir davent da ses uffizi da construcziun auta cun la satisfacziun ch'el ha cuntanschì ordvart bunas prestaziuns en il servetsch dal chantun e ch'el po surdar a ses successur in team cumpetent.

Jau engraziel cordialmain ad Erich Bandi er en num da la regenza grischuna per ses servetsch engaschà e per l'ordvart buna e constructiva collavuraziun plain confidenza. Per l'avegnir l'accumpognan ils megliers giavischs ed jau sper ch'el possia passentar ina bella e lunga terza part da la vita ensemen cun sia famiglia.

Stefan Engler, cusseglier guvernativ

Gremium: departament da construcziun, traffic e selvicultura
Funtauna: rg departament da construcziun, traffic e selvicultura