Il cussegl da fundaziun da la fundaziun succurs d'enviern dal Grischun ha approvà il quint 2001 ed ha prendì cun satisfacziun enconuschientscha da la fitg buna acziun da collecta 2001.

Sut il presidi da ses parsura, cusseglier guvernativ Stefan Engler, ha il cussegl da fundaziun dal succurs d'enviern dal Grischun approvà en sia sesida ordinaria dals 19 da zercladur il quint da l'onn 2001. En cumparegliaziun cun l'onn avant èn las entradas s'augmentadas per var 1/3, e quai grazia a las numerusas e generusas donaziuns. Uschia ha il succurs d'enviern dal Grischun gidà a numerusas persunas basegnusas en il chantun Grischun e quai en il senn da la devisa da la collecta 2001.

"Sch'i manca l'essenzial..."
"Sch'i manca l'essenzial..." sa clomava l'appel da la collecta per l'onn 2001. Il succurs d'enviern dal Grischun ha prestà agid e conderschì contribuziuns finanzialas a var 130 famiglias ed a var 30 persunas singulas. El ha fatg quai a moda nunbirocratica e spontana. L'agid è daventà necessari pervia d'ina dischoccupaziun nunspetgada, d'in salari memia pitschen, da malsogna u d'accident.
Il dumber dals dischoccupads cun entradas nunsuffizientas n'è betg sa sminuì en noss chantun; el è plitost s'augmentà. Bleras persunas pertutgadas da la paupradad ston nutrir ina famiglia cun in budget anc pli stretg e sentan bler pli ferm las consequenzas da las pitschnas entradas. Umans che n'han betg existenza malgrà lur entradas datti er en il Grischun. La lavur na protegia betg pli cunter la paupradad.
Il dumber da las famiglias u da las persunas sulettas ch'èn dependentas dal sustegn dal succurs d'enviern dal Grischun vegn stringentamain a s'augmentar ils proxims onns. Grazia al bun resultat da la collecta vegn il succurs d'enviern dal Grischun ad esser en il futur anc pli en il cas da gidar a proveder cun l'essenzial las famiglias u persunas singulas en noss chantun.

Gremi: Fundaziun succurs d'enviern dal Grischun
Funtauna: rg Uffizi chantunal dal servetsch social