En sia davosa sesida ha la regenza grischuna prendì posiziun davart la midada da l'ordinaziun da viafier e da las disposiziuns executivas respectivas. Particularmain sa tracti da la sanaziun dals passadis da viafier che n'èn betg segnads u ch'èn segnads mo cun la crusch d'Andrea. Quests passadis èsi da segirar u d'eliminar. L'ordinaziun prevesa in termin fin il pli tard l'onn 2014, nua che tut ils passadis da viafier privlus ston esser sanads.

Participaziun da la confederaziun?
En sia posiziun per mauns da l'uffizi federal da traffic rinviescha la regenza grischuna al fatg che sulettamain per sanar ils passadis da la Viafier retica resultan custs totals da plirs milliuns. Perquai pon ins observar quest termin mo, sche la confederaziun sa participescha finanzialmain a moda decisiva vi da la sanaziun dals passadis da viafier. Sche la confederaziun refusass era vinavant, cuntrariamain a tuttas aspectativas, in sustegn finanzial decisiv per sanar ils passadis da viafier, alura na pon il chantun Grischun e las interpresas da viafier activas en il chantun betg observar il termin per la sanaziun dals passadis. Plinavant è la regenza s'exprimida davart diversas dumondas detagliadas da l'ordinaziun da viafier e da las disposiziuns executivas.

Regiuns e vischnancas
Per la citad da Glion resp. per las vischnancas da Schluein, Puntraschigna e per il circul da Tavau duai vegnir elavurada la basa per valitar privels ed auas grondas. La regenza ha approvà ina contribuziun da 35'000 francs per quests studis. L'import total dals studis munta a 175'000 francs.
La regenza ha approvà il nov statut d'organisaziun dal circul dal register funsil da Surses ed ha acceptà la fusiun da l'administraziun dal register funsil en las vischnancas dal Surses.
Plinavant ha la regenza tegnì quint ed approvà ils sequents conclus communals:
- la revisiun da la lescha communala da taglia da la vischnanca da Maladers;
- la revisiun parziala da la constituziun communala da Schnaus;
- la revisiun da la planisaziun locala da St. Peter;
- la revisiun parziala da la planisaziun locala da Rueun (l'inscripziun en il plan "parcadi planisà" en il territori "Perpionas" n'è dentant betg vegnida approvada);
- la revisiun parziala da la lescha da construcziun da Bever.

Persunal
La fin da zercladur van las sequentas emploiadas ed ils sequents emploiads chantunals en pen- siun:
- Erich Bandi, architect chantunal;
- Reinhold Hänz, mastergnant tar l'uffizi districtual da construcziun bassa 1, Cuira;
- Johannes Keller, laborant;
- Mathis Roffler, cumissari da taglia;
- Josef Rüegg, primsergent tar la polizia chantunala;
- Gisela Tomio, assistenta administrativa tar la polizia chantunala;
- Josef Wasescha, polizist tar la polizia chantunala.
La regenza engrazia els per ils servetschs ch'els han prestà en favur dal chantun.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun