La populaziun residenta dal Grischun è s'augmentada ils davos diesch onns per 13'200 persunas; ils 5 da december 2000 aveva il chantun Grischun 187'058 abitantas ed abitants. Quai resulta da las cifras las pli novas da la dumbraziun dal pievel 2000.
En cumparegliaziun cun la Svizra è la populaziun dal Grischun s'augmentada pli ferm durant ils onns novanta. Da 1990 fin 2000 è il dumber da la populaziun grischuna s'augmentà per 7,6 pertschient (Svizra 6,0 pertschient). En ina generaziun (1970 fin 2000) è il dumber d'abitants dal Grischun s'augmentà per 15,4 pertschient; quai è levamain sut la creschien-tscha svizra da 16,2 pertschient. Durant ils onns settanta muntava l'augment entant a modests 1,6 pertschient (Svizra 1,5 pertschient), è el creschì tranter 1980 e 1990 per 5,7 (Svizra 8,1 pertschient) e tranter 1990 e 2000 relativamain ferm per 8,1 pertschient (Svizra 6,6 pertschient).

Differenzas da regiun a regiun
Las regiuns dal Grischun èn sa sviluppadas fitg differentamain. L'augment da la populaziun il pli grond entaifer 30 onns han gì la Val dal Rain grischuna cun 23,1, la regiun Mantogna - Tumleastga cun 21,2 e l'Engiadin'ota cun 20,0 pertschient. La Val Calanca e la Val Puschlav èn sa depopuladas per 11,4 resp. 9,8 pertschient, e las regiuns marginalas Bergiaglia, Valragn e Val Mesauc n'han betg surpassà l'augment da 5 pertschient.

La populaziun è repartida a moda fitg differenta en las regiuns. La Val dal Rain grischuna cun ina quota da 36,5 pertschient e la Surselva cun ina da 13,5 pertschient cumpiglian gia la mesadad da la populaziun grischuna. Uschia pertutgan las ulteriuras 13 regiuns anc quotas da populaziun tranter 0,4 (Val Calanca) e 9,3 pertschient (Engiadin'ota).

Nova repartiziun dals mandats dal cussegl naziunal
Sin fundament da la dumbraziun dal pievel vegn fixada da nov mitga diesch onns l'attribuziun dals 200 mandats dal cussegl naziunal als chantuns, e quai en proporziun cun lur populaziun. Mintga 36'440 abitants han il dretg d'in mandat. Malgrà la creschientscha pertschientualmain pli auta da la populaziun grischuna tranter il 1990 ed il 2000 da 7,6 per-tschient en cumparegliaziun cun la populaziun svizra (6,0 pertschient) èn vegnids attribuids al Grischun puspè tschintg mandats; per gudagnar in mandat fissan stads necessaris var 13'400 abitants dapli. Ils chantuns Vad, Friburg e Sviz han gudagnà in mandat, ils chantuns Berna, Basilea Citad ed Appenzell dador han pers in mandat.

Gremi: uffizi per economia e turissem
Funtauna: rg uffizi per economia e turissem dal Grischun