L'onn 2001 èn vegnids surdads en il Grischun 82 pertschient da las incumbensas publicas ad interpresas grischunas. La valur totala da las 4267 incaricas registradas da la statistica è muntada a circa 411 milliuns francs. Da quels èn vegnidas surdadas circa 3496 incaricas cun ina valur da 333 milliuns francs a firmas grischunas.

Il departament da construcziun, traffic e selvicultura dal Grischun maina dapi trais onns ina statistica per ils fatgs da submissiuns publicas. Questa dat ina invista en tge dimensiun che las reglas vertentas da submissiun vegnan applitgadas sin plaun communal e chantunal. Uschia vegnan registradas incaricas da construcziun, furniziuns e prestaziuns da servetsch che vegnan attribuidas tenor la cunvegna GATT/WTO davart las submissiuns publicas. Per regla sa tracti latiers da projects da submissiun pli gronds, tar ils quals i pon offrir interpresas da tut ils pajais che han firmà la cunvegna GATT/WTO. Tar quels tutgan ils commembers da la UE, ils Stadis unids da l'America, Giapun ed auters. Plinavant vegnan er registradas incumbensas che vegnan attribuidas dal chantun, da vischnancas e d'auters incumbensaders suttamess a las submissiuns publicas en applicaziun dal dretg chantunal da submissiun.

Volumen d'incumbensas GATT/WTO da 99 milliuns francs
L'onn 2001 èn vegnidas attribuidas 122 incaricas en la valur totala da circa 99 milliuns francs tenor las cundiziuns da la cunvegna GATT/WTO. Mesirà vi da la quantitad da las incumbensas surdadas munta la part da las interpresas grischunas a 72 pertschient, cun circa 73 milliuns francs è la gronda part per incumbensas da construcziun. Da quest volumen da construcziun èn ids 83 pertschient ad interpresas grischunas. Firmas da l'exteriur han be obtegnì duas incumbensas da construcziun tenicamain pli cumplexas en il sectur da la segirezza en ils tunnels, quai en la valur totala da circa dus milliuns francs.

Protecziun tras la distanza anc adina actuala
Er l'evaluaziun statistica per las surdadas da lavur tenor il dretg chantunal da submissiun mussa sco gia l'onn precedent ch'ins ha pudì resguardar offerents grischuns tar la pli gronda part da las acquisiziuns. L'onn 2001 èn vegnidas attribuidas 3408 (82 pertschient) da totalmain 4145 surdadas annunziadas ad offeriders cun sedia en il chantun Grischun. Mesirà vi dal volumen da las incumbensas da totalmain 289 milliuns francs munta la part da las interpresas grischunas per tut ils geners d'incaricas ad 86 pertschient.
Sco che la pratica da surdada da fin uss ha mussà gioga la protecziun natirala tras la distanza a basa da la situaziun geografica dal chantun Grischun ina rolla che n'è betg da sutvalitar en favur da la mastergnanza indigena, malgrà l'avertura dal martgà ch'è succedida. Sch'ins considerescha las incumbensas da construcziun attribuidas en il rom d'ina procedura averta, alura èn ids circa 172 milliuns da circa 186 milliuns francs (93 pertschient) da las summas d'incumbensa ad interpresas dal Grischun.

Procedura tut tenor la valur d'incumbensa
Entaifer tschertas valurs d'incumbensa pon las incaricas vegnir attribuidas libramain u tras la procedura d'invitaziun. L'evaluaziun da la statistica 2001 ha mussà, sco l'onn precedent, che las instanzas da surdada na nizzegian savens betg or dal tut lur libertads d'acziun e tschernan dad els or ina procedura superiura u invidan offriders extrachantunals.
Surstar fa il fatg che la part dals retschaviders da l'attribuziun d'entaifer il chantun è pli auta ch'en la procedura libra nua che l'incumbensader po sez definir il circul dals offerents, e quai tant tar las incumbensas da construcziun sco er tar las incumbensas da prestaziuns da servetsch ch'eran stadas publitgadas en il fegl uffizial dal chantun Grischun en procedura averta per la concurrenza libra.

Gremi: schef dal departament da construcziun, traffic e selvicultura
Funtauna: rg schef dal departament da construcziun, traffic e selvicultura