Il Centre for Energy Policy and Economics (CEPE) da la SPF da Turitg ha intercurì la capacitad da concurrer a pli lunga vista da las ovras idraulicas svizras. Las perspectivas èn generalmain bunas. Tar in considerabel dumber da las ovras exista dentant il basegn d'agir. Qua pudessan meglierar la situaziun mesiras accumpagnantas e politic-economicas. Il chantun Grischun ha gia instradà insaquantas mesiras che portan dapli flexibilitad.
Tenor il studi CEPE "Perspektiven für die Wasser-Kraftwerke in der Schweiz" vegn influenzada en l'avegnir il pli fermamain la capacitad da concurrer dals pretschs dal martgà da forza electrica e dals custs da chapital. Il tschains d'aua, la quota d'aua restanta e las taglias giogan perencunter ina rolla secundara. Sco mesira politic-economica che duai meglierar la situaziun da concurrenza vegn recumandada, cunzunt ina internalisaziun dals custs externs (p.ex. grevezza fiscala d'energias betg regenerablas).
Il chantun Grischun prenda cun satisfacziun enconuschientscha dal resultat dal studi ch'ils tschains d'aua na determineschian betg primarmain la capacitad da concurrer. Pervi da l'impurtanza economica e da l'economia d'energia da la forza idraulica ha el prendì dacurt pliras mesiras, che duajan contribuir a mantegnair a lung temp la forza idraulica. Latiers trais exempels:
- En connex cun l'imposiziun da taglias sin las ovras da partenadi èn il chantun e l'economia d'electricitad sa cunvegnids cun in contract ch'il success economic da la forza electrica duaja esser ina cumponenta essenziala per l'imposiziun da taglias.
- En connex cun las novas concessiuns da las ovras electricas Partenz da la Rätia Energie Klosters SA èn vegnidas fixadas prestaziuns da concessiun flexiblas. La summa da cumpra per las ovras che crodan enavos dependa numnadamain dal success economic da las interpresas durant la durada futura da la concessiun.
- Ensemen cun ils chantuns da muntogna ed ulterius purtaders da la Germania, Austria e da la Svizra sustegna il chantun Grischun il project cun il num "Hydro Power Net". La finamira da quest project èsi da cuntanscher ina meglra capacitad da concurrer per la forza idraulica enten tgirar la reputaziun, realisar relaziuns entretschadas da know-how e cun porscher attracziuns a la populaziun.
Il chantun Grischun è persvadì da l'internalisaziun dals custs externs che duai vegnir realisada tenor il studi CEPE da la confederaziun.

Remartgas:
- Centre for Energy Policy and Economics en l'internet: www.cepe.ethz.ch
- Download dal studi CEPE: www.cepe.ethz.ch, rubrica "News"
- Empustaziun dal studi CEPE: www.admin.ch/edmz u tel. 031-325 50 50, numer d'empustaziun: rapport "Langfristige Perspektiven" 805.053 d

Gremi: uffizi d'energia dal Grischun
Funtauna: rg uffizi d'energia dal Grischun