La disposiziun relaschada ils 9 da fanadur 2002 dal departament federal da l'intern (DFI) e da la conferenza svizra dals directurs chantunals da l'educaziun publica (CDE) garantescha ch'ils novs certificats grischuns da maturitad tenor las disposiziuns dal reglament per renconuscher la maturitad (RRM) pussibiliteschian als students il dretg d'access al studi a la scola politecnica federala ed a las universitads.

L'onn da scola 2002/2003 porta als gimnasis grischuns grondas sfidas ch'èn colliadas cun ina cesura impurtanta. A la fin dal proxim onn da scola vegnan las emprimas gimnasiastas ed ils emprims gimnasiasts grischuns a terminar lur scolaziun tenor las disposiziuns dal reglament per renconuscher la maturitad (RRM). Il medem mument vegnan ils davos diploms emess tenor las disposiziuns veglias cun ils tips da maturitad.

Sin dumonda dal departament d'educaziun, cultura e protecziun da l'ambient ha il DFI e la CDE disponì gia uss, suenter in'examinaziun exacta dals documents, la renconuschientscha naziunala dals novs certificats grischuns da maturitad tenor il RRM. Renconuschids vegnan cunzunt er ils attestats da matura per il nov curs biling (tudestg/rumantsch u tudestg/talian) a la scola chantunala grischuna a Cuira, a l'Institut autalpin Ftan ed a l'Academia Engiadina. La regenza ed il departament d'educaziun, cultura e protecziun da l'ambient èn s'engaschads intensivamain per pudair metter a disposiziun il curs per la matura bilingua e per ch'ils attestats da matura vegnian er renconuschids sin plaun naziunal.

Sa basond sin la lescha davart las scolas medias revedida l'onn 1988 realiseschan tut ils gimnasis grischuns dapi l'onn da scola 1999/2000 las directivas dal reglament per renconuscher la maturitad (RRM). Per garantir la qualitad da la scolaziun e per survegnir enconuschientschas davart eventualas pussaivladads da meglieraziun sa participeschan ils gimnasis grischuns ad in project naziunal, cun il qual vegnan evaluads novs curs (project EVAMAR).

Gremi: departament d'educaziun, cultura e protecziun da l'ambient dal Grischun
Funtauna: rg departament d'educaziun, cultura e protecziun da l'ambient dal Grischun