Cun la nova lescha federala davart la protecziun da la populaziun e la protecziun civila sa mida il champ da lavur da la protecziun civila a moda decisiva. En emprima lingia na stat betg pli la protecziun da la populaziun civila en cas da guerra, mabain plitost l'agid en cas da crisa e da catastrofa. Ultra da quai vegn la protecziun civila en il futur a realisar dapli ella, enstagl da l'armada, acziuns en favur da la publicitad.

Perquai che l'armada na stat en il futur quasi betg pli a disposiziun per la montascha e demontascha da las infrastructuras d'occurrenzas grondas, duai ina part da questas incumbensas vegnir surprendida da la protecziun civila. En il Grischun vegn quest fatg ad avair per consequenza ch'i dat midadas fitg radicalas en il champ d'incumbensas da la protecziun civila. Uschia vegn engaschada la protecziun civila, ultra da las ac-ziuns a la Expo per exempel, er durant ils dis da las cursas da chavals a Maiavilla, il CM da skis alpins a San Murezzan ed autras occurrenzas grondas (annexa 1). Gia durant ils onns passads ha la protecziun civila dà in bun sustegn a talas occurrenzas grondas ed en cas da catastrofas.

Sustegn pli e pli intensiv dals emprims meds d'engaschament
En il sectur da l'agid en cas da catastrofas resta la protecziun civila bain er vinanvant in med da la segunda squadriglia. Ils emprims meds d'engaschament èn la polizia, ils pumpiers e la sanitad. Per garantir ils engaschaments a lunga vista da quests meds, vegn la protecziun civila ad assegnar en il futur parts da sias formaziuns situativ a questas organisaziuns. Gia davent da la stad 2002 vegn la protecziun civila dal Grischun a metter a disposiziun duas dad otg uschenumnadas secziuns da sanitad rapidas e davent da 2003 quatter secziuns da sanitad. L'effectiv da las secziuns cumpiglia 22 schuldads da protecziun civila e samaritanas e samaritans che prestan in servetsch facultativ da protecziun civila. Els vegnan alarmads da la centrala operativa per il clom d'agid sanitar 144. Plinavant è previsa la scolaziun da var 150 pioniers "protecziun civila e polizia". Quests schuldads da protecziun civila vegnan scolads da la polizia chantunala, èn suttamess ad ella e vegnan engaschads per simplas incumbensas da la polizia sco la regulaziun dal traffic u sumegliantas chaussas; els n'han betg armas. Tut tenor il basegn e la regiun pon vegnir delegads plinavant singuls elements d'ina cumpagnia da protecziun civila sco unitad da pichet e sco secziun da sustegn rapida per collavurar cun la polizia da fieu e cun ils servetschs tecnics.
Pir suenter che la nova basa legala è avant maun pon ins giuditgar quai per district. Sco mesira preventiva per l'intervenziun en il cas ch'i sa derasass ina zoppina vegn furmada ina uschenumnada secziun d'epidemia. Questas persunas obligadas da far servetsch da protecziun civila vegnan scoladas da l'uffizi da veterinari l'onn 2003 e suttamessas a l'uffizi per acziuns.

Scolaziun prolungada
Gia a partir da l'onn proxim vegn organisada la recrutaziun dals schuldads grischuns da l'armada e da la protecziun civila communablamain durant ina mustra da trais dis a Mels (SG). Suenter absolveschan ils schuldads attribuids a la protecziun civila da nov ina scolaziun fundamentala e professiunala generala da trais emnas a Cuira. Fin uss durava il curs d'introducziun var tschintg dis. Il curs annual da repetiziun per ils commembers dal corp da la protecziun civila dura 2 fin 5, per il cader e per ils spezialists fin 10 dis.

Realisaziun per il 1. da schaner 2004
La lescha federala davart la protecziun da la populaziun e la protecziun civila è vegnida elavurada d'ina gruppa da project federala. La discussiun en il cussegl naziunal è previsa per la sessiun d'atun 2002 e l'entrada en vigur è planisada per il 1. da schaner 2004. Quest project sforza il chantun Grischun da reducir las 43 organisaziuns da protecziun civila da fin uss (var 8000 schuldads da protecziun civila) per il 1.-1-2004 sin mo pli sin 12 cumpagnias da protecziun civila (var 3000 schuldads da protecziun civila). Las cumpagnias (annexa 2) vegnan, cun excepziun da la cumpagnia da protecziun civila da Tavau, repartidas sin ils districts politics. La direcziun politica vegn ad avair da nov la regenza chantunala (annexa 3). L'obligaziun da far servetsch sa reducescha per diesch onns e terminescha per regla la fin da l'onn, en il qual vegn cumplenì il 40avel onn.

Gremi: Uffizi per la protecziun civila e l'agid en cas da catastrofas
Funtauna: rg Uffizi per la protecziun civila e l'agid en cas da catastrofas