La regenza grischuna s'engascha tar la direcziun da l'expo 02 che almain parts da la publicaziun uffiziala da l'expo 02 "ImagiNation" cumparan en lingua rumantscha. I correspunda al respect ed a la toleranza visavi las minoritads regiunalas che la publicaziun uffiziala da l'exposiziun naziunala svizra vegn publitgada en las linguas naziunalas. Quai scriva la regenza en ina brev al president da l'expo 02, Franz Steinegger.

La regenza grischuna ha confidenza en la politica da traffic cumprovada sin l'axa dal nord al sid
La regenza grischuna refusescha mumentan la planisaziun e la construcziun d'in segund tunnel al Gottard. En sia consultaziun per maun da l'uffizi federal per vias en connex cun l'iniziativa parlamentara "per in segund tunnel a la via A2 dal Gottard" da cusseglier naziunal Ulrich Giezendanner s'engascha la regenza grischuna cleramain per la politica da traffic odierna, numnadamain: da metter la spediziun da martganzia da transit sin rodaglias e da na crear capacitads da vias supplementaras.

La regenza sustegna il sboz da la lescha davart ils studis d'embrios
La lescha davart ils studis d'embrios regla pliras dumondas avertas en connex cun il studi d'embrios da memia e da cellas embrionalas giuvnas. Per pudair perscrutar embrios da memia e cellas embrionalas giuvnas ston en il futur vegnir ademplidas cundiziuns fixas. La regenza grischuna sustegna il sboz preschent da la lescha federala. Ella scriva en sia resposta en connex cun la consultaziun al uffizi federal per sanadad che la nova lescha impedescha l'utilisaziun abusiva da las cellas embrionalas giuvnas e protegia la dignitad umana.

1,3 milliuns francs per la Viafier retica
La regenza grischuna ha approvà la cunvegnientscha d'agid d'investiziun nr. 38 e nr. 39 cun la Viafier retica (VR). Cun quai vegnan mess a disposiziun radund 1,3 milliuns francs per il nov post da direcziun per l'entira rait da la VR (Rail Control Center RCC) a Landquart e per il nov binari dubel sur la punt dal Rain posteriur a Tusaun. Domadus projects stattan en connex cun l'urari nov dalla viafier 2000. En il RCC vegnan integrads e remplazzads trais dals odiern otg posts da direcziun dal tren. Il binari dubel a Tusaun pussibilitescha als trens directs che van da Cuira a San Murezzan da sa cruschar a Tusaun empè da Seglias. Cun quai resultescha tranter auter er'ina meglra colliaziun per las numerusas lingias da bus davent da Tusaun.

Contribuziuns chantunalas per diversas organisaziuns ed instituziuns
- La regenza grischuna ha approvà radund trais milliuns francs per augmentar la capazitad dal stabiliment per dismetter rument a Trimmis.
- L'archiv da cultura da l'Engiadin'ota survegn per il onn 2002 in agid finanzial da fr. 20'000.- per lavurs d'inventarisaziun.
- La regenza grischuna ha garantì al CB Scuol ed al TC Mustér ina contribuziun dal sport-toto. La summa totala munta a radund fr. 21'000.--.
- Per la realisaziun dal center da documentaziun e da scuntrada dals jens a Turitg survegn l'associaziun dals vagants in agid finanzial da fr. 20'000.--.

Or da las vischnancas e las regiuns
- La regenza ha approvà il plan d'avertura general 1:50'000 "Ennavada pista fin giu la val, secziun 1" da la vischnanca da Scuol.
- La vischnanca da Praez ha decidì en il schaner ina revisiun parziala da la planisaziun communala. La regenza ha era approvà il plan da zonas parzial 1:2000 "Oradavos".
- Sin la via taliana da Panaduz vegn engrondì il sectur en il vitg en direcziun da Razén per radund 130 meters.
- Sin la via da colliaziun Mompé Tujetsch vegn la paisa maximala auzada da 11 resp. 18 tonnas sin 28 tonnas. Questa midada pertutgà il toc da la via tar la diromaziun da la via Alpsura enfin tar la via chantunala a Mompé Tujetsch.
- Per la via da colliaziun chantunala Braggio-Stabio vegn augmentada la paisa maximala da 11 sin 19 tonnas e la largezza maximala da ozandi 2,3 sin 2,55 meters.

Projects da vias
Per lavurs da rempar e reparaturas sin il toc Rueun-Pigniu/Panix ha la regenza approvà fr. 460'000.-; medemamain conceda la regenza fr. 750'000.- per la cumpra d'in auto-cisterna dals pumpiers per il tunnel dal San Bernardin.

Persunal
Christine Bucher, sesenta a Cuira, è vegnida eligida sco nova manadra dal post da stab dal departament d'educaziun, cultura e protecziun da l'ambient. Ella entra en uffizi il 1. da mars 2003. Christine Bucher è la vicedirectura dal seminari da scolasts grischun.

Chanzlia chantunala grischuna


Gremi: regenza
Funtauna: rg chanzlia chantunala grischuna