Ils 24 d'avust po il president da la regenza Claudio Lardi surdar en
il rom d'ina festivitad finala che ha lieu a la scola chantunala a 78
magistras e magisters lur attestat da qualificaziun. Quest attestat da
qualificaziun legitimescha ils magisters d'instruir al stgalim superiur
talian resp. englais.
L'october 2000 ha il cussegl grond revidì l'ordinaziun executiva tar
la lescha da scola e fixà latiers in nov canon da roms per il stgalim
superiur da la scola populara. Tenor questa revisiun duai la lingua
englaisa vegnir purschida sco rom obligatori per tuttas scolaras e tuts
scolars. En la part da lingua tudestga dal chantun Grischun vegn vitiers
talian sco rom obligatori. En il onn da scola 2002/03 entschaivan tuttas
scolaras e tuts scolars da l'emprima classa dal stgalim superiur cun
englais, en scolas da lingua tudestga ultra da quai cun talian.
En reguard a la nova situaziun èsi da qualifitgar la magistraglia da
la scola reala e secundara en ils roms da linguas estras. La scolaziun
correspundenta ha lieu a Cuira dapi la primavera da l'onn 2000.
L'andament da la scolaziun correspunda a la scolaziun che vegn purschida
a l'universitad da Turitg. Prof. Walter Hohl, anteriur directur da la
furmaziun da scolasts secundars e da scolasts da roms a l'universitad da
Turitg, operescha sco manader dal curs.
In andament da la scolaziun cumpiglia trais semesters. La
magistraglia sa scolescha vinavant en la cumpetenza linguistica sco er
en la didactica da linguas estras, litteratura e cultura. Sper ils curs
che vegnan purschids mintgamai las sondas sco instrucziun unificada han
lieu emnas compactas en linguistica e litteratura. Duas dimoras a
l'ester cun curs da program intensiv vegnan manadas tras en il territori
linguistic correspundent.
La scolaziun cumplementara a la professiun presuppona da la
magistraglia in grond engaschament e blers sforzs da lavur. Da l'autra
vart però porscha la scolaziun er in enritgiment en l'emprender
profundamain ina lingua estra ed en la cunfruntaziun cun ina instrucziun
moderna da linguas estras.
L'emprim curs è vegnì terminà a la fin da zercladur l'onn 2001, il
segund en la stad l'onn 2002. Enfin l'onn 2004 han lieu en tut quatter
curs.
Gremi: uffizi per las scolas popularas e las scolinas
Funtauna: rg uffizi per las scolas popularas e las scolinas