A l'apero d'energia dals 28 d'avust vegnan preschentads materials innovativs per l'isolaziun termica. La tecnica da vacum vegn pli e pli interessanta er per la branscha da construcziun. Spezialmain sch'igl è avant maun pauc plaz pon fatschadas, palantschieus e plafonds vegnir isolads uschia en moda efficazia. Er en il sectur da fanestras han ins cuntanschì svilups remartgabels per meglierar l'isolaziun termica. Tar las fanestras cun isolaziun termica auta èn tendidas tranter ils vaiders folias surtratgas che reduceschan rigurusamain perditas da chalur.

Hanspeter Eicher (Eicher & Pauli SA) infurmescha davart il stadi da la tecnica d'isolaziun cun vacum e sias tendenzas. En ils davos onns èn vegnidas realisadas pli e pli bleras chasas d'energia minimala cun in consum d'energia fitg bass. Latiers dovran ins fermezzas d'isolaziun da 20 fin 40 cm. Quai ch'è oz anc l'excepziun vegn damaun gia ad esser standard; spezialmain sch'i reussescha da realisar il medem effect d'isolaziun cun paraids exteriuras bler pli finas.
En il sectur da sanaziun datti savens situaziuns nua ch'il plaz per cuntanscher in'isolaziun termica che correspunda a l'isolaziun da standard vertenta è char u insumma gnanc avant maun.

Bruno Arnold (ZZWANCOR SA) mussa plattas d'isolaziun da vacum che cuntanschan in'isolaziun termica 5 fin 10 giadas meglra che las materias d'isolaziun convenziunalas. Cun metodas da producziun modernas e la pli nova tecnica da folias èn ins oz capavels da construir plattas d'isolaziun da vacum che mantegnan lur funcziunament per decenis. Cun quai vegn questa tecnica da vacum interessanta er per il sectur da construcziun.

Rolf Kissling (HFF Häring fanestras e fatschadas SA) rapporta da svilups essenzials tar fanestras cun isolaziun termica auta ch'ins po duvrar tant per construcziuns novas sco er en il sectur da sanaziun. L'isolaziun excellenta vegn obtegnida cun folias transparentas che na sa laschan stgarpar. Quellas èn tendidas en il spazi tranter ils vaiders.

Materias d'isolaziun innovativas vegnan duvradas pli e pli savens. Exempels èn las chasas da scola da Malix (GR) e Schwerzenbach (ZH), la surbajegiada d'energia minimala a Stäfa (ZH) e la sanaziun d'energia minimala da l'edifizi da l'administraziun a Liestal (BL).

L'apero d'energia da l'uffizi per energia dal chantun Grischun ha lieu mesemna, ils 28 d'avust a las 17.00 a la scol'auta per tecnica ed economia a Cuira. Ils referents èn dr. Hanspeter Eicher (Eicher & Pauli SA), Bruno Arnold (ZZWANCOR SA) e Rolf Kissling (HFF Häring fanestras e fatschadas SA).

Gremi: uffizi per energia
Funtauna: rg uffizi per energia