Navigation

Inhaltsbereich

  • Erste Mitteilung
  • Neuen Beitrag einfügen
Ils 22 da settember vuschais Vus, charas conburgaisas e chars conburgais, sur dal project chantunal tar la lescha davart ils instituts da furmaziun per la sanadad ed ils fatgs socials. Entras l'approvaziun da questa lescha pudais Vus metter ils binaris per quest sectur da scolaziun uschia che in'offerta da scolaziun che correspunda al basegn e ch'è da gronda qualitad po vegnir mantegnida e promovida er en il futur. Jau recumond ord persvasiun da metter quests binaris e da sustegnair il project da lescha, il qual il cussegl grond recumonda unanimamain suenter intensiva discussiun al pievel d'approvar, cun vuschar GEA.

Nossa societad è pli e pli dependenta da persunal da tgira bain scolà. Tenor mi'opiniun vegn ord differents motivs quest basegn a crescher en l'avegnir. Uschia èsi per exempel da resguardar che d'ina vart s'auza l'aspectativa da vita en nossa societad e che da l'autra vart fan malsognas cronicas crescher il basegn da tgira da blera glieud. Sin fundament dal svilup e dal basegn social èsi impurtant da metter a disposiziun a quellas persunas che vulan surpigliar lavurs da tgira, bunas offertas da scolaziun attractivas. Entras Voss GEA al project da lescha garantis Vus che questa mira po vegnir cuntanschida.
La scolaziun en il sectur da la sanadad e dals fatgs socials n'è betg mo in factur da custs mabain er in factur economic. Ina bun'offerta da scolaziun en il chantun Grischun rinforza il Grischun sco lieu da scolaziun e plaz economic. Il champ da la sanadad e dals fatgs socials appartegna gia oz numericamain tar ils pli impurtants secturs da scolaziun en noss chantun.

Las scolas cun offertas da scolaziun en il sectur da la sanadad e dals fatgs socials ch'èn activas en il grond plaz da Cuira vegnan tras Voss consentiment reunidas giuridicamain ad in center independent da furmaziun per la sanadad ed ils fatgs socials a Cuira. La creaziun dal center da scolaziun ed il project da construcziun ch'è planisà per quai dattan garanzia che las reformas futuras sin plaun naziunal da las scolaziuns en il sectur da la sanadad e dals fatgs socials pon vegnir realisadas. Ultra da quai cuntegna la lescha er basas per ils pajaments da la contribuziun chantunals per scolas en il chantun che na vegnan betg purtadas dal stadi, sco p. ex. la scola professiunala grischuna per tgira a Glion u la scola professiunala superiura per pedagogia sociala a Zizers. Entras Voss GEA tar la lescha garantis Vus ch'il center da furmaziun per la sanadad ed ils fatgs socials vegn construì e ch'il lieu da scolaziun ed economic Grischun vegn rinforzà ensemen cun autras scolas. Betg mo pervia da quellas ponderaziuns skizzadas curtamain sun jau da la persvasiun che la lescha davart ils instituts da furmaziun per la sanadad ed ils fatgs socials meritan Voss consentiment. Entras Voss GEA a la lescha dais Vus ina vaira schanza a la scolaziun en il sectur da la sanadad e dals fatgs socials en noss chantun e entras la creaziun dal center da furmaziun per la sanadad ed ils fatgs socials po vegnir stgaffì in center da cumpetenza, il qual vegn ad avair in effect positv sin ils emprendiders, las chasas da tgira, ils ospitals, ils servetschs ambulants sco spitex ed a la fin finala per noss'entira societad.

Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient
Neuer Artikel