Il cussegl grond po debatter en la sessiun da november 2002 davart la revisiun parziala da l'ordinaziun executiva tar la legislaziun federala davart ils esters ed ils fatgs d'asil (OECGtLEA). La regenza grischuna ha relaschà il messadi necessari. La revisiun parziala vul en emprima lingia ed en accordanza cun la legislaziun federala, crear ina basa legala per promover dapli l'integraziun da persunas estras. La confederaziun ha agiuntà il 1999 dus artitgels d'integraziun a la lescha federala davart la dimora ed il domicil da persunas estras. Uschia po la confederaziun, en collavuraziun cun las vischnancas, ils chantuns e persunas privatas, sustegnair finanzialmain projects d'integraziun. La revisiun parziala da la OECGtLEA vul ussa crear las basas legalas necessarias en il chantun per promover a moda cumplessiva l'integraziun da persunas estras.
La preschenta revisiun da la lescha prevesa tranter auter era d'indemnisar la dretgira districtuala Plessur per l'examinaziun da la legalitad da mesiras repressivas en il dretg dals esters. En il rom da l'organisaziun da las dretgiras è la cumpetenza per questa incumbensa chantunala vegnida transferida dal circul da Cuira sin la dretgira districtuala Plessur.

La regenza pretenda il respustament dal traffic da camiuns pesants sin l'axa dal Gottard
La regenza grischuna ha intervegnì a las discussiuns per l'optimaziun dal sistem da dosar al Gottard. En ina brev a cussegl federal Moritz Leuenberger pretenda ella che cun il nov reschim dal traffic stoppia avair lieu er in respustament dal San Bernardin sin la via dal Gottard. Las mesiras per il traffic da camiuns pesants prendidas enfin ussa al Gottard han gì sulettamain per il chantun Grischun consequenzas negativas. Il augment dramatic da las frequenzas dal traffic da camiuns pesants al San Bernardin e collià cun quai ils ristgs da segirtad che creschan surproporziunadamain n'èn strusch pli da responsar. Calculaziuns cumprovan ch'il nivel da segirtad al Gottard permetta entras il nov sistem d'explotaziun d'auzar las frequenzas dal traffic da camiuns pesants visavi ozendi e da reducir uschia puspè ils viadis detur sur il San Bernardin che è bler pli privlus.

Contribuziuns chantunalas a differentas organisaziuns ed instituziuns
- La regenza grischuna ha approvà ina dumonda da las pendicularas Motta Nalus SA a Scuol e conceda in emprest d'investiziun senza tschains da la confederaziun da 430'000 francs per la construcziun da l'implant da far naiv Furmiers-Scuol. Ultra da quai sa participescha il chantun a sia finanziaziun cun ina contribuziun da maximal 90'000 francs. Resalvada è l'approvaziun dal credit necessari entras il cussegl grond.
- Il chantun presta ina contribuziun da total circa 117'000 francs a la promoziun da cultura (ovras culturalas, occurenzas). En tut èn vegnidas resquardadas 17 dumondas.

Da las vischnancas e regiuns
- La vischnanca da Tschiertschen ha decidì l'onn passà ina revisiun cumplessiva da la planisaziun locala. La regenza grischuna ha ussa approvà la lescha da construcziun, ils plans da zonas 1:1000 e 1:10'000 sco er ils plans generals d'avertura 1:1000 e 1:10'000 cun diversas correcturas, recumandaziuns e resalvas. Vegnì sistì perencunter è la procedura d'approvaziun per il plan general d'avertura 1:1000 "Tscheppa".
- Medemamain ha la regenza grischuna approvà la revisiun dal plan da zonas 1:1000 (revisiun parziala Gartniel) da la vischnanca da Peist e la revisiun da la lescha da construcziun da la vischnanca da Grüsch.
- A la renovaziun dal provediment d'aua (emprim'etappa) da la vischnanca da Riom-Parsonz ha la regenza concedì in import total da circa 160'000 francs.
- La regenza grischuna ha concedì a la vischnanca da Sent in import da circa 228'000 francs per la serenera ARA "Sur En". Tenor ordinaziun da l'uffizi per l'ambient ha la vischnanca laschà elavurar in project per in'ARA cun in element biologic da nattegiar. Quest nov project remplazza in project da l'onn 1994, il qual preveseva in'ARA cun ina smarschera per aua persa da trais parts ed in traject da sfundrada successiv. L'ultim n'ademplescha betg las pretaisas da l'ordinaziun davart la protecziun da las auas ch'è en vigur dapi il 1. da schaner 1999.

Persunal
Willi Walker, sesent a Turitg, è vegnì tschernì sco medi superiur a l'ospital da dunnas Fontana a Cuira. El entra en sia plazza l'entschatta da schaner 2003.

Chanzlia chantunala dal Grischun

Gremi: regenza Funtauna: rg chanzlia chantunala dal Grischun