Anc mai han producì las ovras idraulicas dal Grischun tanta forza electrica sco l'onn 2001. Quests resultats èn stads pussaivels grazia a las precipitaziuns e las grondas massas da naiv.
La producziun da 10'402 milliuns uras kilowat è per 38 pertschient pli gronda ch'il resultat d'in onn ordinari.

Precipitaziuns sur la media...
Il motiv per il ordvart bun resultat han contribuì per l'ina cunzunt las grondas precipitaziuns e per l'autra las massas da naiv spezialmain en las valladas dal sid dal chantun Grischun. Grazia als blers lais artifizials han ins pudì accumular ina gronda part da l'affluenza suenter las precipitaziuns e consequentamain druvar per la producziun da forza electrica. Cun questas bunas cundiziuns da basa han ins pudì surpassar il resultat da record da l'onn 1999 ch'era tar 9'554 milliuns uras kilowat per 848 uras kilowat. En in onn ordinari importa la producziun circa 7'500 milliuns uras kilowat.

... fan plaschair als proprietaris da las ovras, ...
Las bleras auas possibiliteschan als proprietaris da las ovras idraulicas ina producziun sur la media da forza electrica. Cunquai ch'ils custs totals per in onn èn pli u main fixads munta ina producziun pli gronda ch'ils custs per ura kilowat producida èn pli pitschens. L'onn passà è quai stà tant pli plaschaivel cunquai ch'il pretsch dal martgà eran generalmain pli auts ch'auters onns.

...èn buns per la cassa dal stadi...
La producziun da record porta er dapli entradas per la cassa dal chantun Grischun. Las entradas da tschains per remuneraziun per l'utilisaziun da la materia prima forza idraulica èn circa proporziunalmain cun la producziun. Uschia importan las entradas dals tschains d'aua dal chantun per quest onn 61.5 milliuns francs envers 45.5 milliuns francs en in onn ordinari. Cunquai ch'i sa mussava gia l'ultima stad resp. l'atun ina producziun d'electricitad extraordinaria ha la regenza budgetà en il preventiv per l'onn 2002 entradas da tschains d'aua en la summa da 58.4 milliuns francs.

... e sminueschan l'impestaziun da l'aria
Nossa forza idraulica indigena e libra da CO2 sustegna er la protecziun dal clima. Cunquai che las raits europeicas da forza electrica èn colliadas ina cun l'autra signifitgescha mintg'ura kilowat che vegn producida en las ovras idraulicas dal Grischun ch'in'ura kilowat d'in autra ovra electrica (p.ex. en in'ovra electrica d'ieli u da gas) po vegnir spargnada. Quai reducescha la contaminaziun da l'aria.

Remartgas:
- grafica en connex cun il svilup da las entradas dals tschains d'aua dal chantun (vesair agiunta)
- svilup da la producziun/dal consum da forza electrica vesair

Gremi: uffizi d'energia dal Grischun
Funtauna: rg uffizi d'energia dal Grischun