Mardi, ils 29 da schaner sa scuntran ils organs presidials dals parlaments tessinais e grischun a Cuira. A quest inscunter sa participeschan er il president da la regenza Claudio Lardi e la deputaziun taliana dal cussegl grond.
Durant la sessiun da schaner survegn il cussegl grond grischun visita dal "biro" dal parlament tessinais. Il "biro" tessinais stat sut la direcziun dal president dal parlament Ignazio Bonoli e cumpiglia dus vicepresidents, trais presidents da las fracziuns, trais dumbravuschs sco er in secretari dal cussegl grond/vicechancelier ed il secretari da la cumissiun da gestiun.
La delegaziun dal parlament grischun stat sut la direcziun dal president dal cussegl grond Rodolfo Plozza e cumpiglia il president da la regenza Claudio Lardi, ils commembers da la conferenza dals presidents, il chancelier e ses substitut sco er nov commembers da la deputaziun taliana en il cussegl grond.
Sin il program stat ina visita da la sesida dal cussegl grond mardi suentermezdi, in aperitiv en il tschaler da la chasa grischa ed ina tschaina communabla a Cuira.

Gremi: cussegl grond dal Grischun
Funtauna: rg chanzlia chantunala dal Grischun