La regenza grischuna beneventa las stentas da las vischnancas da Flem, Laax, Tumein e Trin, da las vischnancas cunfinantas dals chantuns Glaruna e Son Gagl sco er d'ulteriurs interessents da laschar integrar la "Glarner Hauptüberschiebung" en la glista dal patrimoni mundial dals bains natirals da l'Unesco (World Heritage List). Perquai propona ella al cussegl federal da far la dumonda per l'admissiun a la glista da World Heritage per la cuntrada muntagnarda d'impressiunanta qualitad e cun ina varietad remartgabla d'impurtantas valurs da la natira.
Il fenomen geologic da la "Glarner Hauptüberschiebung" è da renum mundial en ils circuls da geologs pervia da las scuvertas fatgas en quest territori davart la furmaziun da las muntognas. La surfatscha da la ruttadira inversa ch'è impressiunanta e spaziusa en la cuntrada, visibla er per laics, s'extenda sur ils chantuns Glaruna, Son Gagl e Grischun. Las parts che sa chattan en il chantun Grischun (Piz Bargias, Dunschalas) èn bain cuntanschiblas e cleramain vesaivlas.

Contribuziuns chantunalas a differentas instituziuns
- Totalmain 18 ovras culturalas e/u occurrenzas vegnan sustegnidas a basa da las recumandaziuns da la cummissiun per promover la cultura cun contribuziuns da totalmain 142'000 francs.

Da vischnancas e regiuns
- La nova constituziun da la vischnanca da Saas è vegnida approvada.
- La revisiun totala da la lescha da taglia da la vischnanca da Schiers vegn approvada; medemamain la revisiun parziala da la lescha da taglia da la vischnanca da Zizers.
- La regenza ha approvà la revisiun parziala da la planisaziun locala da la vischnanca da San Murezzan; medemamain è vegnida approvada la revisun parziala da la planisaziun locala da la vischnanca da Tumegl.
- A la revisiun totala da la lescha davart las taxas da cura da la vischnanca da Brinzauls è vegnì correspundì. La creaziun da la lescha davart las taxas da cura e la taxa per promover il turissem da la vischnanca da Flond è vegnida approvada; quai vala er per la revisiun dals art. 5 und 6 da la lescha davart l'incassament da las taxas da cura e da sport sco er per la taxa per promover il turissem da la vischnanca da Scuol.
- Per la lavur da mesiraziun en il rom da la revisiun dal cataster, sort 5, da la vischnanca da Zernez ha la regenza concedì ina summa da circa 40'000 francs als custs totals da 284'000 francs.

Projects da vias
- Il project da la vischnanca da Domat per la construcziun da mintgamai ina fermada da bus da las duas varts a la via taliana ed a la colliaziun traversala da Favugn en il territori "Paleu Sura" vegn approvà. Per quai vegni concedì ina contribuziun chantunala da 289'000 francs.
- Ils programs da sanaziun da canera per la via dal Bernina en il sectur da la vischnanca da Brusio sco er per la via dal Bernina e la via veglia dal Bernina en il sectur da la vischnanca da Puntraschigna vegnan approvads.
- Per augmentar la segirezza dals tunnels sin la A13 entras l'installaziun da cumbinaziuns da bassa tensiun e dad interrupturs per las staziuns dal tunnel vegnan approvads totalmain 620'000 francs.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun