En il rom dal project da plazzas d'emprendissadi 16+ da la conferenza svizra da las delegadas a l'egualitad tranter dunnas ed umens è vegnì realisà l'onn 2001 en Svizra in emprim di da las figlias - e quai cun persvadent success. Blers babs e bleras figlias èn sa participads e las reacziuns - er quellas dals manaschis participads - èn stadas praticamain ordvart positivas.

L'emprim di da las figlias è sa drizzà surtut als babs, per far conscient tge rolla impurtanta ch'ils babs han sin il process da la tscherna da professiun da lur figlias. "Jau sai ussa finalmain tge che mes bab fa l'entir di. Igl è plaschì zunt bain a mai!" è stada ina reacziun sin l'emprim di da las figlias 2001. Er quest onn èn dumandads en spezial ils babs, però er las mammas duain prender lur figlias a la lavur. Figlias tranter la 4. e la 9. classa accumpognan ils 14 da november lur geniturs a la lavur.

Pertge mo per mattas?
Igl è anc adina uschia che sin il champ da la tscherna da professiun e da la scolaziun posteriura existan grondas differenzas tranter giuvens e giuvnas - malgrà l'egualitad factica concernent las pussaivladads. Trais da quatter giuvnas che fan in emprendissadi tschernan ina professiun da biro u da vendita, ina professiun en la restauraziun u da cosmetica e da l'igiena dal corp. Encunter quai n'èsi en sasez betg d'opponer. Però las mattas passan sperasvi a bleras professiuns interessantas. Per exempel, mo 6 pertschient da las/ils scrinari(a)s futur(a)s èn giuvnas. Bler dapli dunnas giuvnas fan in emprendissadi da dus onns (trais quarts en cumparaziun cun in quart tar ils mats), fitg paucas fan in emprendissadi da quatter onns (10 pertschient vs. 90 pertschient). Las professiuns tschernidas porschan savens paucas pussaivladads da svilup. Quai maina pli tard als dischavantatgs enconuschents.
Enfin oz èn las perspectivas per in'activitad professiunala per vita duranta e per l'independenza finanziala pli evidentas per ils mats che per las mattas. Cumbain che la quota d'activitad da gudogn da las dunnas crescha constantamain e cumbain che l'activitad da gudogn è vegnida per adina dapli dunnas in sectur da la vita impurtant e per part necessari n'entschaivan bleras mattas la tscherna da professiun betg cun la medema evidenza e las medemas perspectivas a lunga vista sco ils mats. Perquai sa drizza il di da las figlias a las mattas. Ellas dovran en il sectur da la tscherna da professiun in sustegn spezial. Il di da las figlias rinforza la conscienza da sasez da las mattas e facilitescha ad ellas da sviluppar atgnas perspectivas da vita.

Il di da las figlias 2002 entaifer l'administraziun chantunala
La regenza ha envidà quest onn tut ils collavuraturs entaifer l'administraziun chantunala da sa participar al di da las figlias. La regenza signalisescha uschia sia tenuta averta e progressiva concernent la scolaziun ed il svilup professiunal da las dunnas giuvnas e vuless metter in signal per auters manaschis dal chantun. Pertge ch'igl è inditgà er ord vista dal manaschi da promover sistematicamain il potenzial da las dunnas giuvnas. A la fin dal di porscha la regenza in aperitiv a tut ils geniturs participads ed a lur figlias. Quel serva al barat da las experientschas e da las impressiuns communablas e vegn purschì - en collavuraziun cun ils uffizis regiunals da construcziun bassa - a Cuira ed en las regiuns.
Tut il persunal d'instrucziun dal stgalim da mez e dal stgalim superiur è vegnì intimà entras ina brev da dispensar tenor pussaivladad las mattas ils 14 da november. En ils uffizis ed ils biros chantunals vegn quai franc ad esser in di spezial, colurà e da grond enritgiment. E speranza betg mo en quels mabain er en blers auters manaschis dal Grischun!

Infurmaziuns:
Ulteriuras infurmaziuns sur dal di da las figlias pon ins chattar sut www.tochtertag.ch u empustadar tar: 16+ Lehrstellenprojekt der Schweizerischen Konferenz der Gleichstellungsbeauftragten, Wilhelmstrasse 6, 8005 Zürich, tel. 01 271 44 90, fax 01 271 44 91, tochtertag@16plus.ch.

Gremi: post da stab per dumondas d'egualitad
Funtauna: rg post da stab per dumondas d'egualitad