Navigation

Inhaltsbereich

  • Erste Mitteilung
  • Neuen Beitrag einfügen
La nova cunvegna tranter confederaziun e chantuns per il project d'internet "Guichet Virtuel" è sut tetg en il Grischun. Ella regla en ils onns 2003 e 2004 las fasas da funcziunament e da svilup sco er la finanziaziun dal hosting (funcziunament e support). Questa nova cunvegna fixescha a moda pli clera er l'organisaziun dal project e determinescha las responsabladads dals organs. Per ils proxims dus onns sbursa il chantun Grischun en il rom da quest project mintgamai 16'000 francs taxas da hosting. Ils custs totals da 1,2 milliuns francs ad onn per il hosting vegnan smesads tranter confederaziun e chantuns. Mintga chantun surprenda sia part tenor ina clav fixa.
Sin basa da las respostas da la consultaziun precedenta è quel palpiri vegnì repassà ordavant pertutgant las dumondas dal svilup d'ulteriuras applicaziuns, da la segirezza, da l'infurmaziun e communicaziun, dal controlling e da l'organisaziun dal project sco er pertutgant las dumondas da la spartiziun dals custs da l'emprima fasa da manaschi e svilup 2003/2004.

EURES-Trans-Tirolia cun participaziun dal chantun Grischun
Las cunvegnas bilateralas avran a la Svizra la pussaivladad da sa participar als uschenumnads projects EURES. EURES è in'iniziativa da l'Uniun europeica per promover l'occupaziun transcunfinala. La finamira da quell'iniziativa è d'infurmar davart purschidas e dumondas da plazzas en las regiuns da cunfin, d'infurmar e consultar lavurants e patruns davart las relaziuns da lavur e da viver en il pajais vischin (dretg social, da lavur, da pensiun e da tariffa) e da contribuir cun projects cuminaivels a la creaziun d'in martgà da lavur omogen en la regiun da cunfin. La regenza grischuna ha decidì da sa participar vid il EURES-Trans-Tirolia che exista gia, perquai ch'in studi ha mussà che radund 1000 cunfinaris dal Tirol e dal Tirol dal sid lavuran l'onn current en il chantun Grischun. Ultra da quai lavuran en Engiadina radund 800 stagiunaris be dal Tirol dal sid.
Cun quella participaziun vegn il Grischun collià tecnicamain cun il sistem da EED EURES-Trans-Tirolia ch'èxista gia. Tut las plazzas libras, che vegnan endatadas en Grischun en il sistem d'intermediaziun da lavur e da statistica dal martgà da lavur (SILS), pon vegnir administradas online en il Tirol dal nord e dal sid e stattan a disposiziun a tut las autoritads dal martgà da lavur en l'entir spazi da la UE/AECL. EURES na porta betg be ina colliaziun tecnica mabain sa basa er sin ina rait da spezialists d'EURES. QuestAs spezialistAs d'EURES èn ablas da cussegliar sez forzas da lavur indigenas u estras che vulan lavurar en in auter pajais u da stabilir ils contacts necessaris. L'ultim pled davart la participaziun dal Grischun al project EURES vegn ad avair la confederaziun.

Fixà las tariffas maximalas per la tgira da pazients stabels e d'attempads
La regenza Grischuna ha fixà las tariffas maximalas per abitantas ed abitants da purschidas da tgira staziunara per pazients stabels e per persunas attempadas che vegnan sustegnidas finanzialmain dal chantun. Las differenzas da las tariffas maximalas (graduadas en stgalims da tgira, ils uschenumnads stgalims SCRA = sistem da classificaziun e da rendaquint per abitantAs) tanschan il 2003 da 100 fin a 190 francs al di da tgira ed abitantA.
Ultra da quai ha la regenza fixà tant la contribuziun chantunala per ils purtaders da purschidas da tgira staziunara e d'assistenza da pazients stabels e da persunas attempadas e da quotas minimalas da chasas da tgira e partiziuns da tgira d'ospitals sustegnids dal chantun per stanzas singulas, per abitantas ed abitants extrachantunalAs sco er per servetschs da confort.

La scola chantunal ussa tuttina a la Plessur
En otg fin diesch onns duai tut la scola chantunala da Cuira vegnir dischlocada a la Plessur (areal Constantineum). A questa conclusiun è vegnida la cumissiun da planisaziun "Engrondiment e sanaziun da la scola chantunala da Cuira". La regenza grischuna lascha ussa far ils scleriments necessaris. Cun quai lascha crudar la regenza ses conclus dal schaner 2001, da projectar l'engrondiment necessari da la scola chantunala sin l'areal dal seminari da magisters actual /Constantineum/Münzweg/fabrica veglia Willy plus cumplettaziuns cun in local polivalent ed ina medioteca a la scola chantunala sin la spunda.

Da las vischnancas e regiuns
- En il rom dal project da sviament da Roveredo ha la regenza deliberà ina contribuziun da 550'000 francs per stgavaments archeologics ed analisas.
- La regenza ha assegnà a la vischnanca da Trimmis ina contribuziun chantunala da radund 8000 francs als custs per stizzar l'incendi da guaud e cultira dal matg 2002 en la regiun da "Talein".

Projects da vias
- Per la via da colliaziun Mustér - Cavardiras, traject parzial via dal Lucmagn - sbuccada via industriala, vegn dauzà il pais maximal da 18 sin 28 tonnas e midada la largezza maximala da 2,30 sin 2,55 meters.
- Per divers projects da construcziun da vias (cameras da video, lavurs da projectaziun, lavurs da schlargiament e d'indrizs da moduls UUC) ha la regenza deliberà ina summa totala da 2,5 milliuns francs.

Chaussas persunalas
- Silvia Hofmann-Conrad, domiciliada a Cuira, è vegnida elegida sco nova manadra dal post da stab per dumondas d'egualitad.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel