Il "fond da scolaziun" dal chantun Grischun è vegnì stgaffì il 1.
d'avust 1983. Da quel n'èsi dentant anc mai vegnì pajà ora raps. Per
schlargiar il ravugl dals benifiziaris ha la regenza adattà il reglament
correspundent. Dal "fond da scolaziun" vegni concedì davent dad ussa
cuntribziuns subsidiaras per la scolaziun e per la furmaziun
supplementara a persunas cun domicil en il Grischun. Ils benefiziaris da
fin qua, "ils emprendists da professiuns manualas, tecnicas e
commercialas sco er absolvents d'emprendissadis scursanids, da curs da
preparaziun e da sumegliants curs" na vegnan betg dischavantagiads cun
l'adattaziun da la regenza.
Ils chantuns da muntogna consentan l'onn da l'aua 2003 da la ONU
L'onn 2003 è "l'onn da l'aua da la ONU". Il tema "aua" vulan l'onn
proxim tair a niz er ils chantuns alpins per far endament a la
publicitad en acziuns coordinadas la valur economica da l'aua, sia
utilisaziun ecologica en ils chantuns alpins e la muntada sociala da las
regiuns da muntogna en connex cun il provediment d'aua per la Svizra e
per impurtantas parts da l'Europa.
La regenza grischuna sustegna en sia consultaziun da princip
l'engaschament tematic da la conferenza da las regenzas dals chantuns
alpins CRCA. Ella pretenda dentant ina "acziun" concentrada empè d'ina
massa da projects pitschens. Uschia duai vegnir rinforzada la
schientscha che la regiun alpina e si'aua èn indispensablas per in
svilup social durabel.
Contribuziuns chantunalas a differentas instituziuns
La regenza ha garantì contribuziuns a differentas organisaziuns ed
instituziuns;
- totalmain 20'000 francs per acziuns umanitaras ed autras acziuns
d'agid
- totalmain 3700 francs dal fond da sport-toto;
- ina contribuziun al FIS-Snowboard Worldcup dals 30 da november /
1. da december 2002 a Laax;
- 30'000 francs a la dudeschavla missiun d'agid da l'Uniun umanitara
d'agid per la Russia.
Da las vischnancas e da las regiuns
- L'anteriur hotel "Viamala" a l'entrada vers sid da Tusaun è vegnì
classà da "degn da protecziun" a "degn da vegnir mantegnì". La regenza
ha approvà la revisiun parziala dal plan general da furmaziun "Neudorf"
decidida dals votants.
- La revisiun da la lescha da construcziun e dal plan "Änderung
Zonenplan und Genereller Gestaltungsplan Obergass Parz. Nr. 379 - 383"
da la vischnanca da Küblis èn vegnids approbads.
- Ils votants da Schlarigna e da San Murezzan han decidì il mars
1999 ina revisiun da la planisaziun locala che pertutgava tranter auter
la dischlocaziun da la loipa dal maraton en il guaud da Staz. Ussa che
la basa da decisiun è avant maun ha la regenza approvà la revisiun da
las planisaziuns localas.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun