Numerusas midadas vegnan a pertutgar durant ils proxims onns il chantun e las regiuns, uschia ha la confederaziun formulà da nov ina politica d'aglomeraziun ed è vidlonder da repassar ses instruments da la politica regiunala. A chaschun d'ina dieta da mesemna, ils 4 da december vegni discutà a Cuira tge consequenzas che questas midadas vegnan ad avair per il chantun e per las regiuns e tge propostas da soluziun che sa mussan per l'avegnir.

Represchentants da las vischnancas, da las regiuns e da las associaziuns - q. v. d. ils purtaders dals parairis e da las decisiuns da noss chantun - s'entaupan per dar novs impuls al svilup territorial. Ils temas politica d'aglomeraziun e regiunala vegnan ad esser il center da la dieta. Uschia ha lieu dapi l'onn 1998 per la tschintgavla giada ina dieta d'experts davart il svilup dal territori dal Grischun.

Davart da la confederaziun vegn la politica d'aglomeraziun e regiunala actualmain concretisada e repassada. Numerus detagls èn en discussiun, ins po però gia vesair oz midadas impurtantas ch'èn da gronda relevanza per la lavur futura dal chantun, da las regiuns e da las vischnancas. A la dieta vegni orientà sur da la situaziun actuala da las chaussas. Tge signifitgescha quest svilup per il chantun, las regiuns e las vischnancas? Co pudain nus gia oz ans preparar sin questas midadas? Quai èn dumondas che vegnan discutadas en il rom d'in workshop. La dieta duai dar a tut ils participants ina vasta infurmaziun davart ils novs svilups dal territori relevants e mussar propostas da soluziun per l'atgna lavur. Ella sa drizza ad acturs da planisaziun e svilup regiunal che mettan l'accent principal sin il stgalim regiunal e vegn averta dal cusseglier guvernativ Klaus Huber.

Gremi: departament da l'intern e da l'economia publica
Funtauna: rg uffizi da planisaziun / uffizi per economia e turissem