La regenza dat liber per la consultaziun il sboz da la lescha per
promover ina tgira d'uffants per cumplettar la famiglia en il chantun
Grischun. Quel cuntegna la basa fundamentala per finanziar ina purschida
da plazzas da tgira per cumplettar la famiglia e che correspunda als
basegns. La documentaziun per la consultaziun po vegnir retratga dal
departament da giustia, polizia e sanitad (DGPS), il termin scada da mez
avrigl 2002. La basa legala per relaschar cundiziuns per la furmaziun da
l'instrucziun en scola en blocs e per la promoziun da models da scola
dal di vegn elavurada dal departament d'educziun e preschentada pli tard
a la regenza.
Il chantun duai pudair sustegnair la scol'auta teologica a Cuira
(SATC)
La regenza suttametta al cussegl grond il messadi ed il sboz per ina
revisiun parziala da l'ordinaziun davart la renconuschientscha dals
attests da la scol'auta teologica. Da nov duai quest decret tunar sco
suonda: "Ordinaziun davart conceder contribuziuns a la scol'auta
teologica a Cuira sco er davart la renconuschientscha dal stadi dals
attests da la scol'auta". Uschia èsi cler tgenina ch'è la novaziun
principala. Il chantun duai pudair sustegnair finanzialmain questa
scola. Per pudair fixar las contribuziuns duai il departament
d'educaziun concluder ina cunvegna da prestaziun cun la scol'auta. La
situaziun midada en l'uvestgieu, mesiras persunalas sco surtut er
concepts da studi ponderads manidlamain da nov cun ina scolaziun
cumplessiva per la pastoraziun duain contribuir per augmentar
l'attractivitad da la scol'auta per students e studentas da l'uvestgieu
da Cuira, da l'ulteriura Svizra e da l'exteriur. En mira è d'augmentar
visiblamain il dumber da student(a)s. Per l'entschatta da 2003 èsi
previs d'indrizzar in institut pastoral. Essend ch'igl exista oz anc tar
naginas facultads teologicas en Svizra in tal institut pastoral, vegn
quai ad esser ina specialitad da la SATC, che vegn a disponer uschia
d'in punct central ed autonom da scolaziun e furmaziun. Las
contribuziuns chantunalas duajan importar maximal 300'000 francs.
Contribuziuns culturalas
I vegn dà contribuziuns e garanzias da deficit per la summa totala
da 35'000 francs a las suandantas occurrenzas ed ovras culturalas:
- program da cultura da la Chesa Planta a Samedan per l'enviern
2001/2002,
- concerts da l'ensemble Coramor da Cuira dals 16/17 da favrer 2002
a Flem e Cuira (ovras da cumponists tschecs),
- concerts dal Folk-Club Cuira en l'emprim mez onn 2002,
- concert dal chor da la "Marienkirche" Tavau dals 3 da mars 2002
(ovras da Vivaldi, Albinoni e.a.),
- ediziun dal DC "Allas steilas" tras il chor Cantus Firmus e
- 14avla festa da musica per giuvenils da la Svizra dals 13 fin ils
15 da zercladur a Cuira.
Da las regiuns e vischnancas
La constituziun dal circul da la Bregaglia sco era las constituziuns
da las vischnancas da Castasegna e Guarda vegnan approvadas.
Il plan directiv regiunal davart l'implant da tir da la cuntrada da
Tavau vegn approvà cun intginas menziuns.
Fatgs da persunal
A la fin da schaner va en pensiun Edith Ballat, Tusaun, coordinatura
tar l'uffizi da construcziun bassa dal district da Tusaun. La regenza
engrazia per ils servetschs ch'ella ha prestà al chantun.
Cristina Fisler, naschida 1972, da ed a Puschlav, daventa a partir
da l'entschatta matg inschignera forestala regiunala tar l'uffizi
forestal. Ella è l'emprima dunna ch'occupa ina tala posiziun en il
Grischun.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun