La cumissiun predeliberanta dal cussegl grond è s'occupada dal project per il decret d'ina ordinaziun davart la fixaziun da la resalva persunala per la reducziun da las premias da l'assicuranza obligatoria per la tgira da malsauns.

Quest project vegn cundiziunà da la revisiun parziala da la lescha davart l'assicuranza da malsauns e la reducziun da las premias decidida il mars 2002 dal pievel grischun. Tenor questa revisiun fixescha il cussegl grond la procentuala da las entradas d'in tegnairchasa che persunas en relaziuns economicas modestas han da contribuir sezzas per pajar las premias da la cassa da malsauns. Tenor il sboz suttamess da la regenza munta la resalva persunala per entradas imputablas fin 10'000 francs maximalmain a tschintg pertschient. Per mintga ulteriura categoria d'entradas da 10'000 francs s'augmenta ella per in pertschient, fin a diesch pertschient cun entradas imputablas da passa 50'000 francs.

La maioritad da la cumissiun resguarda las resalvas persunalas previsas da la regenza sco adequatas. Cun quest proceder resta la grevezza da premias per persunas en relaziuns economicas modestas constanta durant ils proxims onns, perquai ch'a l'augment da las premias vegni fatg frunt cun in augment correspundent da la reducziun da las premias. Ina minoritad da la cumissiun vuless sbassar la resalva persunala per mintga categoria d'entradas per in pertschient. La maioritad da la cumissiun propona da na betg acceptar questa proposta, e quai rinviond a las finanzas chantunalas fitg precaras ed als custs dal chantun per la reducziun individuala da las premias che vegnan a s'augmentar considerablamain a partir da l'onn proxim.

La cumissiun predeliberanta dal cussegl grond stat sut il presidi da Luzius Ambühl (PLD). Las discussiuns han gì lieu en preschientscha da cusseglier guvernativ Peter Aliesch.

Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond