Navigation

Inhaltsbereich

  • Erste Mitteilung
  • Neuen Beitrag einfügen
La regenza pretenda da la SRG SSR idée suisse indicaziuns liantas davart la planisaziun da termins per l'introducziun da la televisiun digitala en il Grischun. En ina brev al minister da las medias Moritz Leuenberger ed al directur general da la SRG SSR idée suisse, Armin Walpen, insista la regenza sin l'avertura speditiva en il chantun Grischun cun la nova tecnologia da transmissiun "dvb-t". I saja inacceptabel, uschia la regenza en sia posiziun, ch'il Tessin ed il Bassin Lémanique duain survegnir questa tecnica sco emprims, suenter la Svizra bassa e pir durant ils onns 2007/2008 il chantun Grischun. Cun "dvb-t" pon puspè vegnir retschets en il Grischun ils programs da TSI 1 e da TSR 1.

Protecziun speziala per uffants e giuvenils tar la lavur: Na betg perder da vista la realitad
Il departament federal da l'economia vul decretar ina nov'ordinaziun da la lescha da lavur davart la "protecziun speziala per uffants e giuvenils tar la lavur". La regenza grischuna ha fatg attent en sia consultaziun a las formulaziuns ed a las noziuns nuncleras e na betg unitaras dal sboz da l'ordinaziun. Uschia differenziescha il sboz tranter "uffants" e "giuvenils" sco er tranter "obligads d'ir a scola" e "relaschads da scola", senza inditgar ina vegliadetgna concludenda. La regenza ha er s'engaschà fermamain en spezial per l'optica dal sectur da turissem. Uffants duain pudair gudagnar anc adina lur daner da satg er a curt termin durant la fin d'emna en il sectur da turissem (però mo entaifer ina fanestra da temp ch'è definida cleramain). La regenza vul er reglar il servetsch da giuvenils a partir dal 16avel anniversari che lavuran als runals. Els duain er en l'avegnir pudair vegnir incaricads cun lavurs da surveglianza en il sectur da lieus d'entrada e da sortida resp. en il sectur da staziuns da deviaziun.
Ultra da quai pleda la regenza per in'adattaziun da la nov'ordinaziun a las relaziuns effectivas en spezial en il mastergn principal e secundar da construcziun. Qua na pon en spezial betg vegnir incaricads giuvenils senza conclusiun da l'emprendissadi tut tenor lavur enfin la fin dal 19avel anniversari.

L'emissiun da certificats è reglada da nov
La regenza grischuna ha approvà la revisiun totala davart l'emissiun da certificats per burgais svizzers. Quella porta in'adattaziun a la legislaziun federala cumplettamain nova e sclerescha principalmain las proceduras per l'emissiun d'in nov passaport e d'ina nova carta d'identitad. Las propostas emplenidas da las vischnancas vegnan elavuradas ed emessas a l'uffizi da polizia. Enfin ussa èn las cartas d'identitad vegnidas dumandadas da las vischnancas directamain tar il producent. Ultra da quai vegn en il rom da la revisiun totala la repartiziun da las taxas tranter il chantun e las vischnancas reglada da nov. La nova legislaziun da certificats da la confederaziun entra previsiblamain en vigur il 1. da schaner 2003.

SAP: elegì il cussegl da la scol'auta professiunala
La regenza ha elegì il cussegl da la scol'auta professiunala da pedagogia dal Grischun (SAP): ord motivs d'uffizi vegn cusseglier guvernativ Claudio Lardi president. Plinavant vegnan ad esser commembras / commembers dal cussegl Rolf Hanimann, Küblis, Martin Jäger, Cuira, Ladina Maissen-Huder, Trimmis, Jacqueline Stgier, Maiavilla e Livio Zanolari, Cuira. L'elecziun vala per la perioda d'uffizi enfin la fin da zercladur 2004.

Approvà la sanaziun d'edifizis forestals
Enfin la stad avanzada 2002 ha la ferma plievgia chaschunà gronds donns a guauds e terrens cultivads. La regenza ha ussa approvà il project global donns da malaura 2002 en spezial per la reparaziun d'uschenumnads "edifizis forestals" (segirada da las scarpas, drenadis e lingias da deflussiun, reparar vias e fundaments da sustegn). La contribuziun chantunala munta a 944'000.-- francs. Ils custs totals muntan a circa quatter milliuns francs; da quels surpiglia la confederaziun trais milliuns. La finiziun dal project è previsa per la fin da l'onn 2005.

Contribuziuns a differentas instituziuns chantunalas
- L'Ospidal Val Müstair survegn per la cumpra d'ina nova ambulanza ina contribuziun chantunala da 90'000. -- francs.
- La regenza sustegna l'installaziun da l'Uniun marca Grischun UMGR cun 50'000. -- francs . Ultra da quai survegn la UMGR per la durada da tschintg onns ina contribuziun annuala da 20'000.-- francs.
- Per renovar il center da furmaziun e da scolaziun supplementara Rosengarten survegn la federaziun per hotellaria e restauraziun Gastro Grischun ina contribuziun chantunala da var 305'000.-- francs.

Da vischnancas e regiuns
- La regenza ha approvà la revisiun parziala da la lescha communala da taglia da Pasqual e da Bever, medemamain la nova creaziun da la lescha da turissem da la vischnanca da Veulden e da la lescha davart la taxa da promoziun per il turissem da la vischnanca da Saas.
- Cun disposiziun da la regenza han differents uffizis da stadi civil da las vischnancas fusiunà:
- Ils uffizis da stadi civil da Flearda, Masagn, Tusaun, Tschappina ed Urmagn tar l'uffizi da stadi civil Tusaun-Mantogna cun domicil a Tusaun;
- Ils uffizis da stadi civil da Cazas, Preaz, Sarn-Purtagn e Tartar tar l'uffizi da stadi civil Cazas-Mantogna cun domicil a Cazas;
- Ils uffizis da stadi civil da Panaduz, Domat, Favugn, Flem, Razén, Tumein e Trin tar l'uffizi da stadi civil Plaun cun domicil a Domat;
- Ils uffizis da stadi civil d'Andiast, Sursaissa, Pigniu, Rueun, Stussavgia, Siat, Tenna, Valendau, Vuorz e Versomi tar l'uffizi da stadi civil circul da la Foppa cun domicil a Glion.
- En il vitg da Cazas tranter la banca chantunala e l'orticultura Frigg sin ina lunghezza da 200 meters vegn la spertadad reducida da 60 a 50 km/h "general".
- La vischnanca da Zernez survegn ina contribuziun chantunala da var 1800 francs per las expensas en connex cun las lavurs da stizzar l'incendi da guaud en il territori "Ertas" durant l'avrigl 2002.

Projects da vias
Per las lavurs da sanaziun en il tunnel dal San Bernardin ha la regenza approvà ulteriurs 1,4 milliuns francs.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel