Las bovas ed auas grondas extraordinarias da mez november 2002 han
motivà la regenza da dar en incumbensa la planisaziun da novs rempars.
L'uffizi da construcziun bassa dal Grischun vegn ad elavurar novs
projects da rempars per la Val Campliun, Trun, la bova da Schlans,
Schlans, il Ual da Valdun, Rueun, la Val da Dusch, Pasqual, per la
Landwasser e la Rabiusa, Churwalden sco er per il Cosenzbach, Vaz sut.
Las taxas da las patentas d'alcohol da l'onn 2002 èn repartidas
La regenza grischuna ha repartì var 410'000 francs da las
uschenumnadas taxas da las patentas d'alcohol da l'onn 2002. Tenor la
lescha d'ustaria van las entradas dal chantun "ord las taglias sin il
commerzi e la vendita en detagl cun bavrondas destilladas" mintgamai a
mesadad en favur d'intents d'util public e per promover il turissem.
Concretamain obtegnan daners ord las taxas da las patentas d'alcohol da
l'onn 2002 diversas chasas d'uffants e da scola, organisaziuns ed
instituziuns d'impedids, uniuns, federaziuns, fonds e fundaziuns sco er
organisaziuns d'agid a sasez e singuls projects.
Da vischnancas e regiuns
- Ils uffizis da stadi civil d'Arosa, Calfreisen-Castiel-Lüen,
Langwies, Maladers e St. Peter vegnan fusiunads a l'uffizi da stadi
civil Scanvetg cun sedia ad Arosa.
- La regenza ha approvà la revisiun parziala da la constituziun
communala da Zizers. Cun l'entrada en vigur da la lescha chantunala da
scola l'onn 2000 èsi daventà necessari d'adattar la lescha da scolina e
da scola ed il medem mument da midar la constituziun.
- La paisa maximala permessa sin la via chantunala da colliaziun
Uors-Surcasti vegn augmentada da 16 sin 28 tonnas. Il medem mument vegn
augmentada la paisa maximala permessa sin la via da Val S. Pieder,
traject cauvitg Val S. Pieder-cruschada Valé. Qua da 7/16 sin 18 tonnas.
Projects da vias
Per lavurs sin la A13 - tunnel dal San Bernardin sco er traject
Nufenen-Fuchstobel - ha la regenza approvà per augmentar la segirezza
dal tunnel e per lavurs da serrer 107'000 francs.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun