Navigation

Inhaltsbereich

  • Erste Mitteilung
  • Neuen Beitrag einfügen
Sut il motto "Ti n'es betg sulet!" vegn distribuì durant ils proxims dis in flyer a tut las scolaras ed a tut ils scolars dal Grischun a partir da la terza classa primara davart la tematica abus / maltractament. Il flyer è scrit per tudestg, talian e rumantsch grischun.

Da giuvenils per giuvenils ed uffants
Grazia al sustegn da differentas interpresas han ins pudì chattar per la realisaziun da quest'idea ina soluziun ch'è finanzialmain purtabla. Il giuven Simon Matz - graficher en scolaziun - ha creà quest flyer per persunas giuvnas ensemen cun il textader per juniors Gieri Hinnen.

Il flyer è scrit linguisticamain uschia ch'el è bain chapibel per uffants, e plascha però er als giuvenils. Il cuntegn essenzial è:
- Tar nus è insatgi qua per tai.
- Nus mussain a tai las differentas pussaivladads, co ch'i po vegnir gidà a tai.
- Communablamain chattain nus ina soluziun, però ti decidas tez, co ch'i duai cuntinuar.

Il team dal post spezialisà Protecziun da l'uffant spetga, ch'entras la vasta distribuziun dal fegl d'infumaziun vegnan uffants e giuvenils ch'èn pertutgads directamain fatgs attent a la pussaivladad da dumandar agid tar persunas dal fatg. Enfin ussa n'è questa pussaivladad betg vegnida duvrada savens. S'annunziadas èn surtut persunas da referiment creschidas ch'han fatg attent ad abus concret u presumà e ch'han dumandà sustegn.

La protecziun d'uffants periclitads predominescha
Il post spezialisà Protecziun da l'uffant è in post temporar dal chantun che sa chatta en la segunda mesadad d'ina fasa experimentala da trais onns. El è il post da consultaziun en cas da suspect u d'abus cumprovà corporal, psichic e sexual. L'offerta cumpiglia:
- cussegliaziuns d'uffants e giuvenils
- cussegliaziuns da geniturs, persunas da referiment, instituziuns
- interventziuns da crisa en cas d'urgenza
- lavur da scleriment tar uffants e giuvenils, tar ils quals igl exista il suspect d'abus u da maltractament
- introducziun da mesiras da protecziun da l'uffant e da proceduras penalas sco er l'accumpagnament da las persunas pertutgadas.

La protecziun d'uffants e giuvenils periclitads entras mesiras adattadas stat en il center da la lavur. Igl è però er impurtant da sustegnair las famiglias pertutgadas e lur ambient (magistras/magisters, mussadras/mussaders, terapeutas/terapeuts e. u. v.). Ensemen cun autras persunas dal fatg ed instituziuns vegnan planisads ils pass che pussibiliteschan ina meglieraziun durabla da la situaziun dals pertutgads.

Ils post spezialisà è cuntanschibel durant 24 uras sur il numer da telefon 081 258 31 90. Las cussegliaziuns èn gratuitas. Ils collavuraturs èn suttamess a l'obligaziun da discreziun ed igl exista er la pussaivladad da sa laschar cussegliar anonimamain.

Il post spezialisà exista dapi il 1. da mars 2001 ed ha sia sedia a la Grabenstrasse 40. El è affilià a l'uffizi dal servetsch social ed è responsabel per l'entir chantun.

Il post vegn manà da Franz Bütler ch'è er manader dal post da cussegliaziun Agid a victimas tar l'uffizi dal servetsch social. Lucrezia Berther ed Anna Schwarz èn collavuraturas.

Durant quests 21 mais ch'il post spezialisà exista èsi reussì a la "protecziun da l'uffant" da stgaffir in provediment per tut la surfatscha dal chantun Grischun. La collavuraziun cun las existentas instituziuns socialas, pedagogicas, medicinalas e tutelaras è garantida e sa cumprova. En cas da basegn pon commembers dal team vegnir engaschads al lieu, dapertut en il chantun. Ina incumbensa impurtanta dal post spezialisà è l'intermediaziun da terapias adattadas che duain effectuar ina meglieraziun durabla da la situaziun. Enfin ussa èn vegnids tractads ca. 150 cas - dal suspect ch'ins sto prender serius enfin tar la fasa d'elavuraziun cun tgira psicologica.

Gremi: Post spezialisà per la protecziun da l'uffant
Funtauna: rg Post spezialisà per la protecziun da l'uffant
Neuer Artikel