Navigation

Inhaltsbereich

  • Erste Mitteilung
  • Neuen Beitrag einfügen
A partir dal proxim onn vegnan emess a las burgaisas svizras ed als burgais svizzers novs passaports e novas cartas d'identitad. Ensemen cun la nova legitimaziun vegn introducì ina nova furma d'emetter tals. Las taxas vegnan armonisadas en l'entira Svizra.

Il passaport svizzer enconuschent che datescha da l'onn 1985 na vegn betg pli emess e betg pli prolungà a partir da la fin da december 2002. El vegn remplazzà entras in passaport ch'è pli pitschen e ch'è legibel d'ina maschina. Il nov passaport è valaivel per diesch onns e na po betg vegnir prolungà. Medemamain n'èn las registraziuns d'uffants betg pli pussaivlas.

Damain datas persunalas
Tar la carta d'identitad na mida betg bler. Il format da carta da credit vegn mantegnì, la carta d'identitad cuntegna però damain datas persunalas. Da nov vegn il passaport svizzer a custar 120 francs e la carta d'identitad 65 francs. Tuttas duas legitimaziuns pon vegnir retratgas ensemen per 128 francs. Per uffants e minorens valan taxas reducidas.

La nova furma d'emetter, en il chantun Grischun na vegnan ils passaports betg pli producids entras l'uffizi da polizia dal Grischun, mabain centralmain entras l'uffizi federal per edifizis e logistica, ha per consequenza in bler pli lung temp da furniziun. In passaport ch'è vegnì pretendì vegn per regla tramess directamain a las burgaisas ed als burgais entaifer trais emnas.

Empustar novas legitimaziuns a temp
En cas urgents pon ins pretender in passaport provisori tar la vischnanca. Quel vala maximalmain dudesch mais. La carta d'identitad d'urgenza d'enfin ussa scroda. Il passaport provisori vegn emess da l'uffizi da polizia dal Grischun entaifer in di e custa 100 francs. Sco enfin ussa exista la pussaivladad da retrair en cas urgents ed ordaifer las uras da biro regularas in passaport provisori a l'eroport da Turitg.

Almain a l'entschatta da l'onn 2003 ston in quintar cun gronds retards tar la producziun dals passaports. A burgaisas e burgais che duvran il schaner in passaport recumandain nus da prolungar anc durant il december 2002 il passaport d'enfin ussa u da dumandar l'emissiun d'in passaport 85. Passaports valaivels pon vegnir duvrads er en l'avegnir. Las novas legitimaziuns pon vegnir pretendidas tar la vischnanca da domicil a partir d'immediat.

Gremi: uffizi da polizia dal Grischun
Funtauna: rg uffizi da polizia dal Grischun
Neuer Artikel