La concurrenza per acziuns en connex cun l'ambient ch'è vegnida lantschada il zercladur 2001 dal schef dal departament d'educaziun, cultura e protecziun da l'ambient ha chattà in resun legraivel. Sco resultat èn vegnids inoltrads 19 projects cun in vast spectrum interessant. Da la scolina fin tar il stgalim superiur han ils uffants e giuvenils, ensemen cun lur persunas d'instrucziun, demussà entusiassem per in project en connex cun l'ambient.
Ils projects inoltrads mussan il grond entusiassem e correspundentamain il grond engaschament da las classas da scola en favur da la natira e da l'ambient. Per la giuria n'èsi betg stà simpel da proponer projects per la premiaziun. Correspundentamain a las categorias da vegliadetgna publitgadas ha la giuria elegì ils sequents projects:
- "Schulhühner-Projekt", stgalim inferiur scola primara Conters, magister Benjamin Bardill,
- project "Mein Baumfreund", quarta classa scola primara Herold Cuira, magistra Lisbeth Vonmont, e
- project "Bioprodukte aus dem Schulgarten", scola reala Landquart, magister George Schlegel.
Ultra da quai han ins surdà duas premias spezialas:
- Construcziun nova d'in biotop da puz, scola cumplessiva Duin, magistra Monica Calonder, e
- Tractar il tema "Abfall und Recycling", scola primara Bever, magistras Ursina Pinggera, Tania Badel e Claudia Bezzola.
- La summa da premi munta a mintgamai 1'000 francs che van en la cassa da la classa.

Er sche betg mintgin dals projects inoltrads ha pudì gudagnar in premi, meritan tuttina tut las classas da scola ch'èn sa participadas in cumpliment per lur engaschament e las grondiusas prestaziuns en favur da l'ambient. Tschintg projects èn s'occupads cun la construcziun u il mantegniment da biotops da puz e lajet, trais projects cun il tema aua, biodiversitad e parc naziunal. Ulteriurs projects concernan la creaziun d'ina senda instructiva davart las auas, l'inscenaziun d'in gieu liber "Kraut und Rüben" ed in'acziun da plantas. Sa participadas èn classas da la Surselva, da la Val dal Rain grischuna, da la Tumleastga, dal Partenz, da l'Engiadina sco er dal Puschlav.

En occasiun da la premiaziun engrazia cusseglier guvernativ Claudio Lardi en sia funcziun sco minister da la furmaziun e da l'ambient a las classas che han gudagnà in premi ed a tut las autras classas per lur participaziun ed exprima sia renconuschientscha per las prestaziuns en favur da la natira e da l'ambient. El accentuescha ch'i saja impurtant che la giuventetgna possia s'occupar da projects concrets en connex cun l'ambient. Il plaschair vi dal contact cun la natira e l'ambient ch'ins ha percepì tar tut ils projects promova la realisaziun d'interess sin il champ da la protecziun da l'ambient en il mintgadi. Uschia cumpiglia er la noziun da la persistenza ch'è orientada vers l'avegnir in cuntegn concret e perceptibel: protecziun da l'ambient che vegn prestada da vairas protecturas e vairs protecturs da l'ambient en bleras regiuns e cun differents projects singuls.

Gremi: departament d'educaziun, cultura e protecziun da l'ambient dal Grischun
Funtauna: rg uffizi per l'ambient