La regenza propona da realisar in center da furmaziun sin il sectur social e da sanadad. Ella suttametta al parlament la missiva ed il sboz per ina nova lescha correspundenta. Quella duai vegnir tractada dal cussegl grond en la sessiun da matg e probablamain suttamessa a la votaziun dal pievel il settember 2002.

La necessitad da forzas da lavur sco er quella da purschidas da scolaziun e da scolaziun supplementara en las professiuns socialas e da la sanadad publica mussa ina tendenza cleramain creschenta. Da là èsi giustifitgà d'augmentar l'attractivitad dal sectur da scolaziun per las professiuns socialas e da la sanadad publica. Dapi plirs onns vegni tschertgà da manar communablamain las scolas da tgira en la regiun da Cuira e da cumbinar las purschidas da scolaziun. L'iniziativa per quest pass è vegnida sustegnida dals cussegls da fundaziun da la scola professiunala da sanadad e tgira da malsauns e da la scola interconfessiunala da sanadad e tgira da malsauns dal Grischun. La nova lescha davart l'institut da scolaziun sin il sectur da la sanadad e social persequitescha la finamira da coordinar e da diriger las purschidas da scolaziun. I vala da garantir en il chantun Grischun ina scolaziun che correspunda al basegn, d'auta qualitad e ch'è avantagiusa ord vista economica.

Bajetg nov en il Kantengut a Cuira
Per pudair cuntanscher questa finamira duain las scolaziuns a las suandants scolas vegnir reuinadas sut in tetg en il "center da furmaziun sin il sectur social e da sanadad" a Cuira:
- scola professiunala da sanadad e tgira da malsauns (SPS&T),
- scola interconfessiunala da sanadad e tgira da malsauns dal Grischun (SIT),
- scola grischuna da tgira psichiatrica da malsauns, che vegn manada dal chatun e
- la partiziun naseminaristica da la scola da dunnas dal Grischun.

Il center da furmaziun duai vegnir dirigì cun in mandat da prestaziun. Per il center da furmaziun sin il sectur social e da sanadad ch'è legalmain independent duai vegnir construì en la directa vischinanza da la scola da dunnas dal Grischun in bajetg nov. Quel pudess esser en funcziun probablamain l'onn 2006. Fin là stuess il center da furmaziun vegnir manà a moda decentrala en ils sis differents lieus da fin qua.

Segirar ina scolaziun optimala
Per pudair metter a disposiziun ina scolaziun che correspunda al basegn, d'auta qualitad e ch'è avantagiusa ord vista economica e per coordinar e diriger las purschidas da scolaziun en il chantun, propona la regenza d'extender il champ d'applicaziun da la lescha er sin lieus da scolaziun sin il sectur social e da sanadad cun purtaders nunstatals. Cun talas scolas pon er vegnir stipuladas cunvegnas da prestaziun ed alura duain las prestaziuns er vegnir indemnisadas.
Il sboz per la lescha è vegnì coordinà al svilup sin plaun federal, che vegn a manar a la situaziun che las scolaziuns sin il sectur social e da sanadad vegnan integradas en la legislaziun da la furmaziun professiunala. Las futuras refurmas da furmaziun che vegnan proponidas da la confederaziun duain vegnir realisadas a moda efficazia. Cun il sistem da finanziaziun proponì po vegnir transfurmà pass per pass il nov model da finanziaziun da la confederaziun per qua tras pudair diriger il svilup dals custs sin il sectur da scolaziun sin il sectur social e da sanadad.

Gremi: regenza
Funtauna: rg departament d'educaziun, cultura e protecziun da l'ambient dal chantun Grischun