Il comité directiv per las festivitads giubilaras da 2003, cumponì
oriundamain be dad umens, è vegnì cumplettà cun duas dunnas e consista
uss da las suandantas persunalitads:
- Claudio Lardi, president da la regenza, co-president,
- Stefan Engler, cusseglier guvernativ, co-president,
- Silvio Jörg, secretari dal departament d'educziun, cultura e
protecziun da l'ambient,
- Flurin Caviezel, schef da l'uffizi da cultura,
- Peter Crufer, substitut dal schef da l'administraziun da finanzas,
sco er da nov
- Monica Keller, actuara tar la dretgira administrativa e
- Sina Bardill, manadra dal post da stab per dumondas d'egualitad
(biro d'egualitad GR).
Al comité directiv cumpeta la direcziun strategica e la controlla
dal project. Manader dal project è Mariano Tschuor, manader da redacziun
per ils secturs cultura populara e teater tar la televisiun svizra DRS.
Consultaziuns per mauns da la confederaziun
La confederaziun propona da nov ina decleraziun da rauba per autos
da persunas. Tgi che venda autos novs sto dar enconuschent a clientas e
clients il consum d'energia e las emissiuns da CO2 dals vehichels. La
regenza grischuna beneventa la revisiun parziala correspundenta da
l'ordinaziun d'energia. Questa ha l'intenziun da prestar ina
contribuziun per che las finamiras da la lescha davart CO2 e dal program
energiaSvizra possian vegnir cuntanschidas. Las indicaziuns respectivas
ston vegnir fermadas bain visiblas vi da l'auto da persunas u en sia
vischinanza sco er vegnir menziunadas en ils documents da vendita, en
las localitads da vendita ed en las scrittiras da reclama. Pir cun
questa novaziun èsi pussaivel da cumparegliar il consum d'energia e quai
stgaffescha ina pli gronda transparenza per la clientella. La regenza
propona ina moda da decleraziun uschè simpla sco pussaivel e chapibla
senza problems er per laics (p. ex. cun circumscripziuns sco "fitg
spargnus" , "main spargnus" e.u.v. u cun letras dad A, pitschen consum
da carburant, fin G, grond consum). Oz ha mintga chantun si'atgna
procedura penala ed ultra da quai existan trais leschas federalas davart
proceduras penalas. La confederaziun vuless armonisar questa situaziun e
propona per quest motiv per l'entira Svizra la medema procedura penala
sco er ina procedura penala unifitgada per giuvenils. Questa unificaziun
duai na be meglierar l'effizienza da la persecuziun penala, mabain er la
segirtad e l'egualitad giuridica.
Il cussegl federal ha revedì la fin da 2001 l'ordinaziun davart
l'agid en favur da territoris d'innovaziun economica e fixà las regiuns
favurisadas. La regenza grischuna aveva adina accentuà en quest connex
che grondas parts dal chantun Grischun (e na be paucas) sajan da
suttametter al decret correspundent. Tenor la confederaziun duai per il
Grischun vegnir resguardada ina part da la populaziun da set
pertschient. Questa cifra cuntradi a la part oriundamain previsa da 24
pertschient uschè fermamain che la regenza refusa questa nova fixaziun
dals territoris d'innovaziun e dals limits colliads cun quels.
Da las regiuns e vischnancas
Il reglament per las zonas da protecziun ed il plan da zonas da
protecziun per las funtaunas Chauols, Peidra Fessa e Mundaditsch a Ftan
vegnan approvads.
L'emprima etappa d'execuziun dal project integral Mesocco vegn
approvà. El ha l'intent da segirar cuntinuadamain e persistentamain las
funcziuns dal guaud da protecziun sur ils abitadis, sur las vias da
traffic sco er sur ils stabiliments industrials ed agriculs. Ultra da
quai èn da sanar e d'amplifitgar divers rempars e l'avertura dal guaud.
I vegn calculà cun custs totals da 7.3 miliuns francs; il chantun presta
ina contribuziun tranter 18 e 21 pertschient.
Per divers projects da construcziun da vias en il chantun vegnan
dads libers credits en l'import total da vaira in milliun francs
(direcziun dal project sviament da Saas, renovaziun e mantegniment da la
ruta dal Son Bernardin sco er il passape Voa Sporz a Planeiras).
Fatgs da persunal
A la fin da favrer van ils suandants funcziunaris chantunals en
pensiun:
- Gerald Tom Brown, Summaprada, vier tar l'uffizi da construcziun
bassa dal district Tusaun,
- Peter Giger, Cuira, pedel/laborant auxiliar tar il labor chemic
per la controlla da victualias e protecziun da l'ambient e
- Claudio Mainetti, Mesocco, schef dal servetsch tar la secziun
tecnica da l'uffizi da construcziun bassa.
La regenza engrazia ad els per ils servetschs ch'els han prestà al
chantun.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun