La politica communala è concreta ed actuala. Ed ella vala sco fundament per ina carriera politica cuntinuanta. Memia paucas dunnas ristgan il saut sin il parchet politic, ni sin plaun communal ni chantunal u schizunt sin plaun federal. Tgenins èn ils motivs? Quai vul eruir il nov studi dal biro d'egualitad dal Grischun. Las vischnancas da Domat, Schnaus, Vaz e Vella sa participeschan.

La realitad è (quai mussa cunzunt il studi davart las vischnancas dal biro d'egualitad che datescha da l'onn 2000): er en il Grischun èn las dunnas represchentadas stgarsamain en ils gremis politics sin plaun communal. Pertge atgnamain? Cun decleraziuns pauschalas (la politica n'interessescha betg las dunnas...) na duess ins betg esser cuntent. Ma: in na dat bunamain nagin material scientific pertutgant questa dumonda. Perquai è sa decidì il post da stab per dumondas d'egualitad da realisar in studi davart quest tema. Quest studi duai infurmar co las dunnas taxeschan sezzas lur situaziun - fitg concret, tar ellas ed en lur vischnanca - e nua ch'ellas vesan pussaivladads e basegns d'agir. Il studi parta d'in punct positiv: co stuessan esser las relaziuns per che las dunnas pudessan s'imaginar da surprender in uffizi politic en lur vischnanca?

Retschertga en quatter vischnancas grischunas
Quatter vischnancas èn stadas prontas (sin fundament d'ina emprima consultaziun l'onn 2000) da persequitar quest tema ensemen cun il biro d'egualitad. Quai èn las vischnancas da Domat, Schnaus, Vaz e Vella. En questas quatter vischnancas duain tut las votantas vegnir interrogadas cun agid d'in questiunari davart lur activitads politicas e lur experientschas sin quest champ. Cun singulas dunnas vegnan fatgas intervistas detagliadas. L'analisa da questas datas pussibilitescha ina invista en las raschuns che pledan per u cunter in engaschament politic. E questa invista po servir danovamain sco basa per ulteriuras mesiras - in'ulteriura finamira dal studi.
Cun quest project obtegna qua la lavur d'infurmaziun e da publicitad ina grond'impurtanza, tant sin plaun communal sco sin plaun chantunal. I dat plirs motivs persuenter: il studi metta pe en in champ nov e po purtar a la glisch novas enconuschientschas che chattan grond interess. Las dunnas en il Grischun n'èn anc mai vegnidas interrogadas en in tala moda e maniera. Ord vista dal concept e da la disposiziun dal studi èsi indispensabel d'avair ina buna politica d'infurmaziun transparenta aifer la vischnanca. D'agiuntar èsi ch'ins vul cuntanscher da princip ina sensibilisaziun per il tema cun il studi.

Stadi actual
L'onn 2001 èn vegnidas instradadas las lavurs preparatorias dal project ed in team da project è vegnì furmà. Quel sa cumpona da la sociologa Katharina Belser, Peiden, da la germanista e schurnalista Silvia Hofmann-Conrad, Cuira, da la istoricra Silke Redolfi, Masagn, e da la represchentanta dal purtader dal project Sina Bardill, manadra dal biro d'egualitad. La part impurtanta da questas lavurs preparatorias è stada d'instradar la collavuraziun cun las vischnancas. Sin fundament dal concept general ha la regenza concludì per il project ina gronda contribuziun finanziala ord il fond da la lottaria naziunala cun l'obligaziun da publitgar ils resultats da la retschertga durant l'onn da giubileum 2003.
Durant ils mais passads è vegnì elavurà il questiunari. Quel sa chatta uss en la fasa da pilot e vegn examinà da dunnas da l'uniun da dunnas da Masagn sco er giuditgà criticamain d'ina gruppa da reflexiun che consista da persunas spezialisadas d'ordaifer. L'enquista cun ils questiunaris definitivs vegn manada tras en il matg/zercladur 2002.

Gremi: biro d'egualitad dal Grischun
Funtauna: rg biro d'egualitad dal Grischun